Էրդողանը խոսել է Ռուսաստանի հետ հարաբերությունները կարգավորելուն միտված քայլերի մասին

Տարածաշրջան07:21, 28 Հունիս 2016

Էրդողանը խոսել է Ռուսաստանի հետ հարաբերությունները կարգավորելուն միտված քայլերի մասին

Թուրքիայի նախագահ Ռեջեփ Թայիփ Էրդողանը նախագահի նստավայրում կազմակերպած բարեգործական ընթրիքին ունեցած ելույթի ժամանակ խոսել է Ռուսաստանի հետ հարաբերությունները կարգավորելուն միտված քայլերի մասին:

Ըստ թուրքական «Mynet.com» լրատվական կայքի` Էրդողանը, հաստատելով Ռուսաստանի նախագահ Վլադիմիր Պուտինին նամակ հղելու մասին տեղեկությունները, ասել է, որ իրենց կողմից քայլեր են ձեռնարկվել հարաբերությունները կարգավորելու նպատակով:

Էրդողանը մասնավորապես ասել է. «Ինքնաթիռի խոցման հետ կապված մեր և Ռուսաստանի միջև խնդիր էր առաջացել: Այն կարգավորելու նպատակով քայլեր ենք արել: Հույս ունեմ, որ Ռուսաստանի հետ հարաբերությունները կրկին զարգացնելու թեմայով ուղարկածս նամակով ձեռք բերված համաձայնությունը օգտակար կլինի երկու երկրների շահերին»:

Թուրքիայի նախագահը նշել է, որ Ռուսաստանի նախագահ Վլադիմիր Պուտինին հղած նամակում ափսոսանք է հայտնել տեղի ունեցածի համար և հիշեցրել, որ երկու երկրները լայն համագործակցություն կարող են ծավալել:

Էրդողանը հույս է հայտնել, որ Ռուսաստանի հետ կարող են հաղթահարել այս ճգնաժամը, որը վնաս է հասցնում երկու երկրների շահերին և արագորեն կարգավորել հարաբերությունները:

Հիշեցնենք, որ երեկ թուրքական մամուլում Կրեմլի լրատվական ծառայությանը հղումով լուրեր էին տարածվել Թուրքիայի նախագահ Ռեջեփ Թայիփ Էրդողանի` ռուսաստանցի պաշտոնակից Վլադիմիր Պուտինին նամակ հղելու մասին, որով Էրդողանը ափսոսանք էր հայտնել ռուսական ինքնաթիռի խոցման միջադեպի առիթով և իր ցավակցությունը հղել զոհված օդաչուի հարազատներին:

Աղբյուր` Ermenihaber.am