Թուրքիայի վարչապետ. «Եթե անհրաժեշտություն լինի, Ռուսաստանին փոխհատուցում կվճարենք»

Տարածաշրջան08:25, 28 Հունիս 2016

Թուրքիայի վարչապետ. «Եթե անհրաժեշտություն լինի, Ռուսաստանին փոխհատուցում կվճարենք»

Թուրքիայի վարչապետ Բինալի Յըլդըրըմը թուրքական «TRT Haber» հեռուստաընկերության եթերով խոսել է ռուս-թուրքական հարաբերությունների կարգավորման, ինչպես նաև նախագահ Ռեջեփ Թայիփ Էրդողանի` Ռուսաստանի նախագահ Վլադիմիր Պուտինին հղած նամակի մասին:

Ինչպես հաղորդում է թուրքական «Haberler» լրատվամիջոցը, Յըլդըրըմն ասել է, որ անհրաժեշտության դեպքում Թուրքան Ռուսաստանին կփոխհատուցի խոցված «SU-24» ռազմական ինքնաթիռի համար:

Յըդըրըմը, նշելով, որ Ռուսաստանը և Թուրքիան իրար կարիքը ունեն, ասել է. «Եթե անհրաժեշտություն լինի կփոխհատուցենք, մենք նախկինում էլ նշել էինք, որ ցանկանում ենք, որ հարաբերությունները կարգավորվեն: Խնդրի էությունը սա է: Սա ոչ թե մի կողմի կամքն է, այլ` երկու կողմերի»:

Անդրադառնալով Էրդողանի նամակին` Թուրքիայի վարչապետը շեշտել է. «Նամակի բովանդակությունը շատ պարզ էր: Հայտնում ենք մեր ափսոսանքները և կիսում մահացածների վիշտը: Սրանից հետո անհրաժեշտ է, որպեսզի հարաբերությունները կարգավորվեն: Հակառակ կողմն էլ այդ ամենը գիտակցում է և իր համաձայնությունն է տալիս: Բիզնես քաղաքականությունում էլ է այդպես լինելու»:

Հիշեցնենք, որ երեկ թուրքական մամուլում Կրեմլի լրատվական ծառայությանը հղումով լուրեր էին տարածվել Թուրքիայի նախագահ Ռեջեփ Թայիփ Էրդողանի` ռուսաստանցի պաշտոնակից Վլադիմիր Պուտինին նամակ հղելու մասին, որով Էրդողանը ափսոսանք էր հայտնել ռուսական ինքնաթիռի խոցման միջադեպի առիթով և իր ցավակցությունը հղել զոհված օդաչուի հարազատներին:

2015թ. նոյեմբերի 24-ին թուրքական F-16 կործանիչները թուրք-սիրիական սահմանին ռուսական ռազմական ինքնաթիռ էին խոցել՝ պատճառաբանելով, թե այն խախտել է թուրքական սահմանը: Միջադեպը երկու երկրների հարաբերությունների վատացման պատճառ էր դարձել:

Աղբյուր` Ermenihaber.am