Ալբանիայի վարչապետի ինքնաթիռը Ստամբուլի օդանավակայան վայրէջք է կատարել պայթյունի պահին

Տարածաշրջան07:39, 29 Հունիս 2016

Ալբանիայի վարչապետի ինքնաթիռը Ստամբուլի օդանավակայան վայրէջք է կատարել պայթյունի պահին

Ալբանիայի վարչապետ Էդի Ռամային տեղափոխող ինքնաթիռը Ստաբուլի «Աթաթուրք» օդանավակայան է վայրէջք կատարել այն պահին, երբ հունիսի 28-ին երեկոյան նույն օդանավակայանում տեղի էին ունեցել ահաբեկչական պայթյուններ: Ինչպես հաղորդում է թուրքական «Sabah» պարբերականի կայքը, վայրէջք կատարելուց հետո Ալբանիայի վարչապետին և նրա ղեկավարած պատվիրակությանը անմիջապես դուրս են բերել օդանավակայանից և տեղափոխել Թուրքիայի կառավարական ընդունելության սրահ: Ալբանական պատվիրակության մեջ տուժածներ չկան:

Այնուհետև Էդի Ռամայը Ստամբուլից ուղևորվել է Թուրքիայի մայրաքաղաք Անկարա՝ «Twitter»-ի էջում գրառելով. «Այդ ահաբեկիչները կրոն և հավատք չունեն, դրանք բարբարոսներից ոչ մի բանով չեն տարբերվում»:

Հիշեցնենք, որ հունիսի 28-ին երեկոյան Աթաթուրքի անվան օդանավակայանում մահապարտների գործադրմամբ 3 հաջորդական պայթյուն էր տեղի ունեցել:

Թուրքիայի վարչապետ Բինալի Յըլդըրըմի տեղեկացմամբ՝ ահաբեկչության զոհերի թիվ 36 է, վիրավորներինը՝ 147: Զոհերի անունները դեռևս չեն հրապարակվում, սակայն հայտնի է, որ նրանց մեջ կան օտարերկրյա քաղաքացիներ կան:

Կան կասկածներ, որ պայթյունը իրականացրել է «Իսլամական պետություն» (ԻՊ) ահաբեկչական կազմակերպությունը:

Աղբյուր` Ermenihaber.am