Թուրքիան և Չինաստանը միջուկային համագործակցության համաձայնագիր են կնքել

Տնտեսական13:08, 01 Հուլիս 2016

Թուրքիան և Չինաստանը միջուկային համագործակցության համաձայնագիր են կնքել

Օրերս Չինաստանում կազմակերպված G20-ի նախարարների գագաթնաժողովի ժամանակ Թուրքիայի և Չինաստանի միջև միջուկային ոլորտում համագործակցության համաձայնագիր է կնքվել: Այն ստորագրել են Թուրքիայի էներգետիկայի և բնական պաշարների նախարար Բերաթ Ալբայրաքը և Չինաստանի ազգային էներգետիկ վարչության տնօրեն Նուր Բեքրին:

Թուրքական «Türkiye» թերթի կայքի տեղեկացմամբ՝ վերջին շրջանում երկու երկրների միջև համագործակցությունը բավական ակտիվորեն զարգանում է: Վերջին 14 տարիների ընթացքում Թուրքիայում ներդրումներ են կատարել 772 չինական ընկերություն: Ներդրումների ընդհանուր ծավալը կազմել է 508 մլն դոլար: Միևնույն ժամանակ Չինաստանում գործում է 26 թուրքական ընկերություն, որոնց ընդհանուր ներդրումները կազմում են 104 մլն դոլար:

Ավելի վաղ Թուրքիայում կազմակերպված G20 գագաթնաժողովի ժամանակ Թուրքիայի և Չինաստանի նախագահների միջև ստորագրվել էր երկաթուղային համագործակցության համաձայնագիր, որի շրջանակներում Չինաստանը պետք է մասնակցի Էդիրնե-Կարս երկաթուղային նախագծի իրագործմանը: Աղբյուրի բնորոշմամբ՝ 30-40 մլրդ դոլար բյուջեով այս նախագիծը Պեկինն ու Լոնդոնը միմյանց կապող ժամանակակից մետաքսի ճանապարհ կարող է դառնալ:

Աղբյուր` Ermenihaber.am