Սիրիայի նախագահը կրկին մեղադրել է Թուրքիային ահաբեկչությանն աջակցելու մեջ

Տարածաշրջան07:35, 15 Հուլիս 2016

Սիրիայի նախագահը կրկին մեղադրել է Թուրքիային ահաբեկչությանն աջակցելու մեջ

Սիրիայի նախագահ Բաշար Ասադը կրկին մեղադրել է Թուրքիային՝ Սիրիայում գործող ահաբեկչական խմբավորումներին աջակցություն ցուցաբերելու մեջ:

Թուրքական «Diken.com.tr» լրատվակայքի փոխանցմամբ՝ ամերիկյան NBC հեռուստաընկերության եթերում Ասադը մասնավորապես հետևյալ մեկնաբանությունն է արել.

«Ամենակարևոր գործոնն այն է, թե ահաբեկչությանը աջակցություն ցուցաբերող երկրները, մասնավորապես՝ Թուրքիան և Սաուդյան Արաբիան, դեռ որքան կշարունակեն դա անել … Եթե այդ երկրները դադարեցնեն իրենց աջակցությունը, մենք մի քանի ամսվա ընթացքում կհաղթեն այս պատերազմում»:

Սիրիայի նախագահը նշել է, որ Սիրիայի կառավարության դեմ պայքարող խմբավորումները Սաուդյան Արաբիայի նյութական աջակցությամբ հավաքվում են Թուրքիայում և ապա ուղարկվում Սիրիա:

«Այս երկրների նպատակը պատերազմը երկարաձգելն է: Եթե կամենան, կարող են ավելի երկարաձգել: Մի շարք տարածաշրջանային և միջազգային ուժեր ներքաշվեցին պատերազմի մեջ: Այդ պատճառով ոչ ոք հստակ չի կարող ասել, թե այս պատերազմը երբ կավարտվի», - ասել է Ասադը:

Նախագահը նաև ուշադրություն է հրավիրել այն հանգամանքի վրա, որ Ռուսաստանի՝ սիրիական պատերազմին միանալուց հետո ընդդիմադիրները սկսել են տարածքներ կորցնել: Մյուս կողմից, Ռուսաստանի հարձակումներից հետո Թուրքիան և Սաուդյան Արաբիան սկսել են ավելի շատ զինյալներ ուղարկել Սիրիա:

Աղբյուր` Ermenihaber.am