Թուրքիայի ԶՈՒ ԳՇ պետի պաշտոնակատար. «Թուրքիան մեկընդմիշտ փակել է հեղաշրջումների ժամանակաշրջանը»

Քաղաքական09:33, 16 Հուլիս 2016

Թուրքիայի ԶՈՒ ԳՇ պետի պաշտոնակատար. «Թուրքիան մեկընդմիշտ փակել է հեղաշրջումների ժամանակաշրջանը»

Թուրքիայի զինված ուժերի (ԶՈՒ) գլխավոր շտաբի պետի պաշտոնակատար գեներալ Ումիթ Դյունդարը հանդես է եկել նախօրեին Թուրքիայի կատրված ռազմական հեղաշրջման փորձի վերաբերյալ հայտարարությամբ:

Թուրքական պետական «Anadolu» լրատվական գործակալության տեղեկացմամբ՝ Դյունդարը նշել է, որ անվտանգության կառույցների ու դատախազությունների կողմից ձեռնարկված հրատապ միջոցառումների շնորհիվ հեղաշրջման փորձը ճնշվել է:

«Պետության ու ժողովրդի միասնականության պատմական օրինակ դրսևորած Թուրքիան ձախողել է այդ հեղաշրջման փորձը: Սակայն այս ընթացքում Թուրքիան, ցավոք, ականատեսը եղավ մի խումբ մարդկանց խելացնորությանն, ովքեր ռմբակոծում ու խոցում են սեփական խորհրդարանը, կառույցները, քաղաքացիներին»:

Դյունդարը նշել է, որ հիմնականում ժանդարմերիայի և օդուժի հրամանատարության ներկայացուցիչներից կազմված խմբի ձեռնարկած շարժումը հենց առաջին պահին մերժվել է ԶՈՒ հրամանատարկան կազմի կողմից:

«Մեր նախագահն ու գլխավոր հրամանատարը, վարչապետը, նախարարները, Թուրքիայի ազգային մեծ ժողովի ներկայացուցիչները զինված ուժերի հետ համերաշխության մեջ լինելով՝ կանգնեցին ժողովրադավարական և արդար երկրի կողքին և կանխեցին այս հեղաշրջման փորձը: Մեր ժողովուրդը կարող է չանհանգստանալ, քանի որ Թուրքիան մեկընդմիշտ փակել է հեղաշրջումների և խունտաների ժամանակաշրջանը», - ասել է ԶՈՒ շտաբի պետի պաշտոնակատարը:

Հիշեցնենք, որ հուլիսի 15-ի ուշ երեկոյան Թուրքիայում սկիզբ առած հեղաշրջման փորձի ընթացքում Թուրքիայի ԶՈՒ գլխավոր շտաբի պետ Հուլուսի Աքարը գերի էր վերցվել: Նրա պաշտոնում ժամանակավորապես նշանակվել էր գեներալ Ումիթ Դյունդարը: Ավելի ուշ կառավարության ուժերի ձեռնարկած միջոցառումների շնորհիվ Աքարն ազատվել է գերությունից:

Աղբյուր` Ermenihaber.am