Թուրքիայում հեղաշրջման հրահանգը ֆաքսով ստացվել է զինված ուժերի գլխավոր շտաբից

Տարածաշրջան08:16, 18 Հուլիս 2016

Թուրքիայում հեղաշրջման հրահանգը ֆաքսով ստացվել է զինված ուժերի գլխավոր շտաբից

Հուլիսի 15-ին Թուրքիայում ռազմական հեղաշրջման փորձ կատարած զինծառայողների ցուցմունքներից ուշագրավ տեղեկություններ են ի հայտ եկել: Թուրքական «Haberler.com» լրատվակայքի տեղեկացմամբ՝ հարցաքննվել են հատուկ նշանակության ուժերի հրամանատարության զինծառայողները, որոնք ձերբակալվել էին ձախողված գործողության շրջանակներում:

Զինծառայող Օսման Չ-ն հարցաքննության ժամանակ հայտնել է, որ հեղաշրջման փորձին մասնակցած զինվորները զինվել են նախագահականի պահակային գնդում: Իսկ գործողությունը սկսելու հրամանը ստացվել է զինված ուժերի գլխավոր շտաբից՝ ֆաքսի միջոցով:

«Հուլիսի 15-ին զորավարժություն անցկացնելու պատրվակով զինվորները բերվեցին նախագահականի պահակային գունդ: Այստեղ զինվորներին կամուֆլյաժ (ներկաքողարկում), զենք ու զինամթերք բաժանվեց», - պատմել է հատուկ նշանակության ուժերի զինծառայողը:

Այնուհետև զինծառայողները անվտանգության ապահովման պատրվակով ուղարկվել են Գյոլբաշըում գտնվող հատուկ ուժերի հրամանատարություն:

Հարցաքննությունների ժամանակ պարզվել է նաև, որ ֆաքսով ստացված հրանհանգում նշված է եղել, թե հրամանատարական կազմը պետք է փոխվի: Հրահանգում մասնավորապես արձանագրվել է, որ գործող հրամանատար Զեքաի Աքսաքալլըն հեռացվել է պաշտոնից, նրա փոխարեն նշանակվել է Սեմիհ Թերզին:

ՀԻշեցնենք, որ հուլիսի 15-ի ուշ երեկոյան Թուրքիայում ռազմական ճանապարհով պետական հեղաշրջման փորձ է կատարվել, որը, սակայն, հուլիսի 16-ի դրությամբ արդեն լիովին ճնշվել է: Օդուժի կիրառմամբ իրագործված հեղաշրջման փորձի հետևանքով, ըստ պաշտոնական տվյալների, եղել է 161 զոհ և 1440 վիրավոր: Ձախողված հեղաշրջման շրջանակներում Թուրքիայում զանգվածային ձերբակալություններ են տեղի ունենում, մինչ այժմ ձերբակալվածների թիվ անցել է 6.000-ը, որոնց մեջ մեծ թիվ են կազմում անվտանգության և իրավաշտպան համակարգի բարձրաստիճան ներկայացուցյիչները:

Աղբյուր` Ermenihaber.am