Թուրքական լիրայի փոխարժեքը նոր ռեկորդային անկում է գրանցել

Տնտեսական09:56, 21 Հուլիս 2016

Թուրքական լիրայի փոխարժեքը նոր ռեկորդային անկում է գրանցել

Միջազգային վարկանիշային Standard and Poor's (S&P) ընկերությունը իջեցրել է Թուրքիայի վարկանիշային միավորը: «Deutsche Welle»-ի թուրքական ծառայության լրատվակայքի տեղեկացմամբ՝ այս հանգամանքով և Թուրքիայում հայտարարված եռամսյա արտակարգ դրությամբ պայամանվորված՝ թուրքական լիրայի փոխարժեքը նոր ռեկորդային անկում է գրանցել:

Նշյալ իրադարձություններից հետո դոլարի նկատմամբ լիրայի փախարժեքը հասել է 3.09-ի, այնուհետև տատանվում է 3.07-3.09 միջակայքում: Նշենք, որ նմանատիպ ցուցանիշ էր գրանցվել նաև 2015թ. հոկտեմբերին (1 դոլար = 3.075 լիրա): Իսկ եվրոյի փոխարժեքը հասել է 3.4 լիրայի սահմանագծին:

Այնինչ, մինչև S&P-ի կողմից Թուրքիայի վարկանիշի իջեցումը դոլարի փոխարժեքը կազմում էր 3.04 լիրա:

Աղբյուրի մեկնաբանմամբ՝ Թուրքիայում տիրող իրավիճակի բացասական ֆոնի պահպանման դեպքում երկրի վարկանիշը կարող է ավելի ընկնել, իսկ դա կդժվարացնի և կթանկացնի Թուրքիայի՝ արտաքին վարկավորման գործընթացը:

Հիշեցնենք, որ նախորդ շաբաթ մեկ այլ միջազգային վարկանիշային կազմակերպություն՝ «Moody's»-ը ևս իջեցրել էր Թուրքիայի վարկանիշային միավորը՝ բացասական գնահատելով այս երկրում տիրող իրավիճակը:

Աղբյուր` Ermenihaber.am