Ադրբեջանի որոշ ռազմական օբյեկտներ Թուրքիայի զինված ուժերի տրամադրության տակ կլինեն

Տարածաշրջան11:54, 21 Հուլիս 2016

Ադրբեջանի որոշ ռազմական օբյեկտներ Թուրքիայի զինված ուժերի տրամադրության տակ կլինեն

Ադրբեջանի Հանրապետության նախագահ Իլհամ Ալիևը վավերացրել է 2016թ հունիսի 3-ին ստորագրված թուրք-ադրբեջանական արձանագրությունը, համաձայն որի, Թուրքիայի զինված ուժերը (TSK) հնարավորություն են ստանում օգտագործել Ադրբեջանի «Kızıl Şark» կոչվող ռազմական ավանի շենքերը և շինությունները, ինչպես նաև ադրբեջանական ռազմական օդանավակայաններից մեկի տերմինալը:

Ի դեպ, վերջինս գտնվում է Ադրբեջանի Հաջը Զեյնելեբիդին գյուղաքաղաքում:

Ինչպես հաղորդում է թուրքական «Haberler» լրատվամիջոցը, նշյալ ռազմական համագործակցության խորացմանը միտված արձանագրության կիրարկման համար Ադրբեջանի նախագահը համապատասխան հանձնարարականներ է տվել երկրի պաշտպանության և արտաքին գործերի նախարարություններին:

Նշենք, որ վերոհիշյալ փաստաթուղթը ստորագրվել էր Թուրքիայի վարչապետ Բինալի Յըլդըրըմի՝ Ադրբեջան կատարած պաշտոնական այցի շրջանակներում:

Աղբյուր` Ermenihaber.am