ԵՄ-ն հեղաշրջման անհաջող փորձից հետո Թուրքիայի նկատմամբ պատժամիջոցներ չի սահմանի

Քաղաքական07:47, 27 Հուլիս 2016

ԵՄ-ն հեղաշրջման անհաջող փորձից հետո Թուրքիայի նկատմամբ պատժամիջոցներ չի սահմանի

Եվրոպական Միության (ԵՄ) ընդլայնան և հարևանության քաղաքականության հարցերով հանձնակատար Յոհաննես Հանը նախորդ շաբաթ ԵՄ հանձնաժողովի նիստում առաջարկել է Թուրքիայի նկատմամբ պատժամիջոցներ սահմանել:

Այս մասին տեղեկացնում է թուրքական «Hurriyet» թերթի կայքը՝ հղում անելով Բրույսելում հրատարակվող «Politico Europe» շաբաթաթերթին: Ըստ աղբյուրի` պատժամիջոցներ սահմանելու առաջարկն արվել էր հուլիսի 15-ին Թուրքիայում իրականացված ռազմական հեղաշրջման անհաջող փորձից հետո հազարավոր պետական պաշտոնյաների և քաղծառայողների աշխատանքից հեռացվելու կապակցությամբ:

Նախաձեռնության հեղինակ Հանն առաջարկել է պատժամիջոցների շրջանակում Թուրքիային տրվող 3 միլիարդ եվրո օգնությունը դադարեցնել: Սակայն Անկարայի նկատմամբ պատժամիջոցներ սահմանելու առաջարկը կասեցրել է ԵՄ հանձնաժողովի նախագահ Ժան-Կլոդ Յունկերը: Վերջինս նշել է, որ այդ գումարը հատկացվում է սիրիացի փախստականներին և նպատակաուղղվում է հասարակական կազմակերպություններին: Յունկերն ընդգծել է, որ ԵՄ-ն չպետք է հրաժարվի Թուրքիայի հետ փախստականների հարցերով պայմանագրից:

Պատժամիջոցներին դեմ է արտահայտվել նաև ԵՄ արտաքին քաղաքականության և անվտանգության հարցերով գերագույն հանձնակատար Ֆեդերիկա Մոգերինին:

Աղբյուր` Ermenihaber.am