Թուրքական իշխանությունները հրաժարվում են հանդիպել Գերմանիայի դեսպանի հետ

Քաղաքական08:50, 28 Հուլիս 2016

Թուրքական իշխանությունները հրաժարվում են հանդիպել Գերմանիայի դեսպանի հետ

Թուրքիայում Գերմանիայի դեսպան Մարտին Էրդմանը չի կարողանում հանդիպել թուրքական պատկան գերատեսչությունների պաշտոնյաների հետ: Արտգործանխարարության կամ կառավարության այլ պաշտոնյաների հետ հանդիպելու դեսպանի ցանկությունը մերժվում կամ մնում է անպատասխան: Թուրքական «Aktifmedya» լրատվական կայքը հայտնում է, որ Գերմանիայի դեսպանի նկատմամբ թուրքական իշխանությունների այդօրինակ վերաբերմունքի պատճառը հունիսի 2-ին Գերմանիայի դաշնային խորհրդարանի՝ Բունդեսթագի ընդունած Հայոց ցեղասպանությունը ճանաչող բանաձևն է:

Բանաձևի ընդունումից հետո Թուրքիայի ու Գերմանիայի հարաբերությունները սրվեցին, իսկ թուրքական կառավարությունը հայտարարեց, որ Գերմանիայի դեմ պատրաստելու է «գործողությունների ծրագիր»:

Ցեղասպանության բանաձևի ընդունմամբ է պայմանավորվում նաև այն, որ Թուրքիան թույլ չի տալիս Գերմանիայի պաշտպանության նախարարության պաշտոնյաներին այցելել ՆԱՏՕ-ի կողմից օգտագործվող թուրքական «Ինջիրլիք» ռազմաբազա և տեսակցել գերմանացի զինվորականների հետ: Աշնանը նախատեսվում է գերմանացի խորհրդարանականների այցելություն «Ինջիրլիք», սակայն Թուրքիայի իշխանությունները դեռևս թույլտվություն չեն տվել, ինչը կոշտ քննադատության է արժանացել Գերմանիայի կողմից:

Աղբյուր` Ermenihaber.am