Գերմանաբնակ թուրք պատգամավորը պահանջել է արգելափակել Էրդողանի բանկային հաշիվները

Քաղաքական13:43, 04 Օգոստոս 2016

Գերմանաբնակ թուրք պատգամավորը պահանջել է արգելափակել Էրդողանի բանկային հաշիվները

Հայոց ցեղասպանությունը ճանաչող և դատապարտող օրինագծին աջակցություն հայտնած Գերմանիայի ընդդիմադիր «Ձախերի կուսակցության» ծագումով թուրք պատգամավոր Սևիմ Դաղդելենը խոսել է Թուրքիայում ստեղծված իրավիճակի և իրականացվող ձերբակալությունների մասին:

Թուրքական «Vandahaber» լրատվակայքի փոխանցմամբ` Դաղդելենը ,խոսելով հուլիսի 15-ի հեղաշրջման փորձից հետո Թուրքիայում ստեղծված իրավիճակի մասին, հանդես է եկել մի կոչով, որը թուրքական աղբյուրը բնութագրում է որպես «սկանդալային»:

Կոչի մեջ մասնավորապես ասվում է. «Էրդողանի բռնի և հրեշավոր քաղաքականության, ինչպես նաև զանգվածային ձերբակալությունների դեմ պետք է անհապաղ պատժամիջոցներ կիրառենք»:

Պատգամավորը գերմանական «Neuen Osnabrücker Zeitung» պարբերականի հետ զրույցում շեշտել է, որ անհրաժեշտ է Էրդողանի բանկային հաշիվների արգելափակման վերաբերյալ պահանջ ներկայացնել, թեև դրանից Թուրքիայի ու Գերմանիայի միջև առկա լարվածությունը էլ ավելի կսրվի:

Հիշեցնենք, որ հունիսի 2-ին Գերմանիայի դաշնային խորհրդարանը (Բունթեսթագը) ձայների ճնշող մեծամասնությամբ (մեկ դեմ և մեկ ձեռնպահ) հաստատել էր Հայոց ցեղասպանությունը ճանաչող բանաձև:

Աղբյուր` Ermenihaber.am