Չավուշօղլու. «Եվրոպան ստորացնում է Թուրքիային»

Տարածաշրջան13:41, 15 Օգոստոս 2016

Չավուշօղլու. «Եվրոպան ստորացնում է Թուրքիային»

Թուրքիայի արտգործնախարար Մևլութ Չավուշօղլուն քննադատել է երկրում տեղի ունեցած ռազմական հեղաշրջման փորձի վերաբերյալ Եվրոպայի ցուցաբերած դիրքորոշումը: «Եվրոպական երկրները Թուրքիային օգնելու փոխարեն ստորացնում են»,- ասել է թուրք նախարարը:

Ըստ «BBC» -ի թուրքական ծառայության` Չավուշօղլուն ասել է, որ Թուրքիան ԵՄ անդամության հարցում գրեթե բոլոր երկրներից ավելի շատ ջանք է ներդրել, սակայն այդ ամենին ի պատասխան ստացել է սպառնալիքներ, վիրավորանք ու դեմ հանդիման մնացել անդամության գործընթացը կասեցնելու հետ:

«Ինքս ինձ հարցնում եմ` մենք ի՞նչ մեղք ենք գործել, որտեղի՞ց Թուրքիայի դեմ այս թշնամությունը»,- ասել է Չավուշօղլուն:

Չավուշօղլուն հերքել է նաև ՆԱՏՕ-ի կազմից Թուրքիայի դուրս գալու մասին խոսակցությունները:

Թուրք նախարարը անդրադարձել է նաև երկրում կրկին մահապատիժը կիրառելու մասին խոսակցություններին. «Եվրոպան այնպիսի դիրքորոշում է որդեգրել, կարծես մենք արդեն վերականգնել ենք մահապատիժը: Այդ թեմայով պահանջներ կան և պետք է հասկանալ դրանք»:

Չավուշօղլուն խոսել է նաև հոկտեմբերին ԵՄ-ի կողմից Թուրքիայի քաղաքացիների համար վիզային ռեժիմի չեղարկումը ուժի մեջ մտցնելու անհրաժեշտության մասին: Լրագրողի այն հարցին, թե վիզային ռեժիմը չեղյալ չհայտարարվելու դեպքում արդյոք աշնանը Թուրքիայից փախստականների հոսք կսկսվի դեպի Եվրոպա, Չավուշօղլուն պատասխանել է. «ԵՄ-ի հետ բանակցությունները շարունակվում են: Չեմ ցանկանում այս պահից ասել ամենավատը»:

Աղբյուր` Ermenihaber.am