Թուրքիայում փակվել է կապի նախարարությունը

Տարածաշրջան09:18, 16 Օգոստոս 2016

Թուրքիայում փակվել է կապի նախարարությունը

Թուրքիայում փակել են Կապի և հեռահաղորդակցության նախարարությունը:

Այդ մասին հայտարարել է Թուրքիայի վարչապետի օգնական և կառավարության խոսնակ Նուման Քուրթուլմուշը:

Ըստ թուրքական «Yenişafak.com.tr» թերթի կայքի` նախարարների խորհրդի նիստից հետո լրագրողների հետ հանդիպած Քուրթուլմուշը տեղեկացրել է նաև, որ գերատեսչության լիազորությունները հանձնվել են Տեղեկատվական տեխնոլոգիաների և կապի վարչությանը:

Նշվում է, որ որոշումն ընդունվել է, Թուրքիայում ռազմական հեղաշրջման փորձից հետո հայտարարված եռամսյա արտակարգ իրավիճակի շրջանակներում: Գերատեսչության բազմաթիվ աշխատողներ կհեռացվեն պաշտոններից հեղաշրջման փորձը կազմակերպելու մեջ իշխանությունների կողմից մեղադրվող իսլամական քարոզիչ Ֆեթուլլահ Գյուլենի կազմակերպությունների հետ այս կամ այն կերպով կապ ունենալու համար:

Հիշեցնենք, որ Թուրքիայում արտակարգ դրության հայտարարումից հետո փակվել է 35 առողջապահական հաստատություն, 934 դպրոց, 109 ուսանողական հանրակացարան, 104 հիմնադրամ, 1025 միություն, 15 համալսարան և 19 արհմիություն:

Աղբյուր` Ermenihaber.am