ԵԽ-ն Թուրքիայում գաղթականների դրության վերաբերյալ զեկույց է հրապարակել

Տարածաշրջան12:03, 17 Օգոստոս 2016

ԵԽ-ն Թուրքիայում գաղթականների դրության վերաբերյալ զեկույց է հրապարակել

Եվրախորհուրդը (ԵԽ) Թուրքիայի վերաբերյալ հատուկ զեկույց է հրապարակել, որում տեղ են գտել փախստականների ճամբարներ գործուղված ԵԽ ներկայացուցչի անցկացրած դիտումների արդյունքները: «Deutsche Welle»-ի թուրքական ծառայության համաձայն՝ զեկույցում մասնավորապես արձանագրվում է, որ Թուրքիայում գաղթական երեխաները վաղ տարիքից աշխատում են և անկանոն են հաճախում դպրոց:

Ճամբարներ այցելած ԵԽ հատուկ ներկայացուցիչ Թոմաս Բոչեքը իր զեկույցում գրում է. «Ես մեծ թվով փոքրիկ երեխաներ տեսա, որոնք ողորմություն էին խնդրում, փողոցներում ինչ-որ բաներ էին վաճառում կամ օգնում էին իրենց ծնողներին՝ վաճառելու նպատակով հին մետաղներ հավաքելու գործում»:

Բոչեքը նաև նշում է, որ բազմաթիվ անչափահաս գաղթական երեխաներ ստիպված են վաղ տարիքից աշխատել, չնայած, որ այդ աշխատանքի դիմաց նրանք ցավալիորեն քիչ են վարձատրվում: ԵԽ դիտորդը համոզմունք է հայտնում, որ երեխաների այդ չնչին աշխատավարձը նրանց ընտանիքների միակ եկամուտն է: Իսկ որպես արդյունք գաղթական երեխաները զրկվում են դպրոց հաճախելու հնարավորությունից:

Նշենք, որ Բոչեքը Թուրքիա էր գործուղվել հունիսի սկզբին՝ երեխաներին և 18 տարին չբոլորած միայնակ գաղթականներին օգնություն տրամադրելու հարցում Անկարային աջակցություն ցուցաբերելու նպատակով դիտումներ անցկացնելու համար:

Աղբյուր` Ermenihaber.am