Թուրքիայի փոխվարչապետ. Թուրքիան կողմնակից է իր բոլոր հարևանների տարածքային ամբողջականությանը

Տարածաշրջան19:42, 28 Օգոստոս 2016

Թուրքիայի փոխվարչապետ. Թուրքիան կողմնակից է իր բոլոր հարևանների տարածքային ամբողջականությանը

Թուրքիայի փոխվարչապետ Նուման Քուրթուլմուշը սոցակայքում գրառում է կատարել՝ խոսելով հուլիսի 15-ին տեղի ունեցած ռազմական հեղաշրջման փորձի, գյուլենականների դեմ ընթացող պայքարի, ինչպես նաև Սիրիայի տարածքում թուրքական զինուժի կողմից իրականացվող «Եփրատի վահան» գործողության մասին:

Թուրքական «Trthaber» լրատվական կայքի հաղորդմամբ` Քուրթուլմուշը նշել է, որ Թուրքիան հուլիսի 15ին տեղի ունեցած հայտնի իրադարձություններից հետո լայնածավալ հարձակման է անցել «Իսալամական պետություն» (ԻՊ) ահաբեկչական կազմակերպության, «Քուրդիստանի բանվորական կուսակցության» (ՔԲԿ-PKK), ինչպես նաև Սիրիայի «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդական պաշտպանության ուժերի» (YPG) դեմ:

Նշենք, որ պաշտոնական Անկարան վերոնշյալ ուժերին դիտում է որպես «ահաբեկչական կազմակերպություններ»:

«Թուրքիան վճռական է սեփական սահմանները պաշտպանելու և անվտանգությունն ապահովելու հարցում: Մենք երբեք չենք լռի, երբ որևէ ահաբեկչական կազմակերպություն իր վերահսկողության տակ վերցնի մեր սահմանները: Սա ազգային անվտանգության խնդիր է: Թուրքիան Սիրիայի, Իրաքի և բոլոր հարևանների տարածքային ամբողջականության կողմնակիցն է»,-գրել է Քուրթուլմուշը:

Աղբյուր` Ermenihaber.am