Էրդողանի մամուլի խոսնակը հերքել է Թուրքիայի՝ Սիրիայի քրդերի հետ համաձայնության գալու մասին լուրերը

Տարածաշրջան13:03, 31 Օգոստոս 2016

Էրդողանի մամուլի խոսնակը հերքել է Թուրքիայի՝ Սիրիայի քրդերի հետ համաձայնության գալու մասին լուրերը

Թուրքիայի նախագահ Ռեջեփ Թայիփ Էրդողանի մամուլի խոսնակ Իբրահիմ Քալընն անդրադարձել է Թուրքիայի զինված ուժերի կողմից Սիրիայի տարածքում իրականացվող «Եփրատի վահան» գործողությանը:

Ըստ թուրքական «Anadolu» լրատվական գործակալության` խոսելով նշյալ թեմայի մասին՝ նա հերքել է վերջերս շրջանառվող այն պնդումները, թե իբր Թուրքիան համաձայնության է եկել Սիրիայի քրդական «Ժողովրդավարական միություն կուսակցության» (ԺՄԿ-PYD)» հետ`կրակի դադարեցման հարցում:

«Գործողության առաջնային նպատակն է մեր սահմանների անվտանգության ապահովումը և այնտեղ գտնվող ահաբեկիչների վնասազերծումը»,-ասել է Քալընը:

Նա դժգոհություն է հայտնել, որ ամերիկացի որոշ պաշտոնյաներ պարբերաբար հանդես են գալիս այնպիսի հայտարարություններով, որտեղ Թուրքիան ԺՄԿ-ի և նրա ռազմական թև հանդիսացող YPG-ի հետ միասին դրվում են միևնույն նժարի վրա:

Անդրադառնալով համաձայնության վերաբերյալ լուրերին , Էրդողանի մամուլի խոսնակը հավելել է, որ Թուրքիան համաձայնության չի գա ԺՄԿ-ի հետ, քանի որ պաշտոնական Անկարան վերջինիս դիտարկում է, որպես Սիրիայում «Քուրդիստանի բանվորական կուսակցության» ենթաճյուղերից մեկը:

Քալընը քննադատել է նաև այն պնդումները, որ «Եփրատի վահան» գործողությունը ուղղված է Սիրիայում ապրող քրդերի դեմ: Ըստ նրա Թուրքիան որևէ խնդիր չունի Թուրքիայում, ՍԻրիայում, Իրաքում և Իրանի Իսլամական Հանրապետության (ԻԻՀ) տարածքում ապրող քրդերի հետ:

Վերջում Քալընը տեղեկացրել է, որ Չինաստանում տեղի ունենալիք Մեծ քսանյակի գագաթնաժողովին մասնակցող Էրդողանը, հանդիպում է ունենալու ԱՄՆ-ի նախագահ Բարաք Օբամայի հետ, որի ժամանակ քննարկվելու է իսլամի հայտնի քարոզիչ, ամերիկաբնակ միլիարդատեր Ֆեթթուլահ Գյուլենի արտահանձման հարցը: