Թուրքիայում հիմնվել է «Օսմանյան կուսակցություն»

Քաղաքական10:06, 02 Սեպտեմբեր 2016

Թուրքիայում հիմնվել է «Օսմանյան կուսակցություն»

Թուրքիայում «Օսմանյան կուսակցություն» անվամբ նոր քաղաքական կուսակցություն է ստեղծվել: CNNTurk-ի տեղեկացմամբ՝ կուսակցության գերբի վրա պատկերված են կիսալուսին, իսկ դրա գլխավերևում՝ արաբերեն «էլիֆ» և «վավ» տառերը (դրանք միասին օսմաներենում կարդացվում են որպես «Օ» - խմբ.)

«Օսմանյան կուսակցության» նախագահ Իբրահիմ Ունյեն տեղեկացրել է, որ իրենք պատրաստվում են շատ կարճ ժամանակում երկրի բոլոր շրջաններում ներկայացուցչություններ հիմնել և մասնակցել առաջիկա ընտրություններին:

Նշենք, որ 2015թ. նոյեմբերի 1-ի Թուրքիայի խորհրդարանական ընտրություններին մասնակցել էին 16 քաղաքական կուսակցություններ, որոնցից միայն 4-ն են ներկայումս ներկայացված խորհրդարանում:

Բացի այդ՝ Թուրքիայում կա ևս 90 կուսակցություն: 2000թ. հետո երկրում հիմնվել է 83 նոր կուսակցություն, որից 44-ը քաղաքական դաշտ է մտել 2010թ. հետո:

Թուրքիայի՝ քաղաքական կուսակցությունների մասին օրենքի համաձայն՝ նոր հիմնվող կուսակցությունների անդամների նվազագույն թիվը 30-ն է: Իսկ ընտրությունների մասնակցելու համար կուսակցությունը երկրի 41 նահանգում և այդ նահանգներից առնվազն 3-ում պետք է ունենա իր ներկայացուցչությունը: