Էրդողանն ու Պուտինը հեռախոսազրույց են ունեցել

Տարածաշրջան11:07, 09 Սեպտեմբեր 2016

Էրդողանն ու Պուտինը հեռախոսազրույց են ունեցել

Սեպտեմբերի 8-ին Թուրքիայի նախագահ Ռեջեփ Թայիփ Էրդողանը և Ռուսաստանի Դաշնության (ՌԴ) նախագահ Վլադիմիր Պուտինը հեռախոսազրույց են ունեցել: Ինչպես հաղորդում է թուրքական «Cumhuriyet» պարբերականը՝ զրույցի ընթացքում կողմերը քննարկել են Սիրիայում տեղի ունեցած վերջին զարգացումները, ինչպես նաև ռուս-թուրքական հարաբերությունների հեռանկարը:

Մասնավորապես, խոսվել է Սիրիայի Հալեպ քաղաքում հրադադարի հաստատման, սիրիական ճգնաժամի կարգավորման, ինչպես նաև Սիրիայի տարածքում Թուրքիայի զինված ուժերի կողմից իրականացվող «Եփրատի վահան» գործողության մասին:

Անդրադառնալով Թուրքիայի կողմից Սիրիայի տարածքում իրականացվող գործողությանը կողմերը կարևորել են «Իսլամական պետություն» ահաբեկչական կազմակերպության վերահսկողության տակ գտնվող տարածքների մաքրման գործընթացները:

Էրդողանը պնդել է, որ այն բանից հետո, երբ թուրքական զորքերի գործողություններից հետո սահմանամերձ Ջերաբլուս և Ալ Րանի շրջանների հարակից տարածքները ԻՊ-ի զինյալներից մաքրվեցին, տեղի բնակչությունը այժմ, ոչ թե գաղթում է դեպի Թուրքիա, այլ վերադառնում է իրենց բնակավայրերը:

Զրույցի ընթացքում երկու նախագահները գոհունակություն են հայտնել լարված երկկողմ հարաբերությունները կարգավորելու ուղղությամբ ձեռնարկված քայլերի կապակցությամբ:

Աղբյուր` Ermenihaber.am