Նյու-Յորքում Էրդողանը հանդիպել է ԱՄՆ-ի փոխնախագահի հետ

Քաղաքական08:17, 22 Սեպտեմբեր 2016

Նյու-Յորքում Էրդողանը հանդիպել է ԱՄՆ-ի փոխնախագահի հետ

Թուրքիայի նախագահ Ռեջեփ Թայիփ Էրդողանը Նյու-Յորքում ընթացող ՄԱԿ-ի գլխավոր ասամբլեայի 71-րդ նստաշրջանի շրջանակներում հանդիպել է ԱՄՆ-ի փոխնախագահ Ջո Բայդենի հետ:

Ինչպես փոխանցում է թուրքական «Ensonhaber» լրատվական կայքը, հանդիպման ընթացքում կողմերը անդրադարձել են սիրիական ճգնաժամին, Կիպրոսի խնդրին, «Իսլամական պետություն» (ԻՊ) ահաբեկչական կազմակերպության խնդրին, հուլիսի 15-ին Թուրքիայում տեղի ունեցած ռազմական հեղաշրջման փորձին, ինչպես նաև իսլամի հայտնի քարոզիչ, ամերիկաբնակ միլիարդատեր Ֆեթթուլահ Գյուլենի արտահանձման հարցին: Մոտ մեկ ու կես ժամ տևած հանդիպումը դռփակ է եղել:

Ըստ թուրքական աղբյուրի` ԻՊ-ի դեմ պայքարում կողմերը կարևորել են թուրք-ամերիկյան համագործակցության խորացումը, ինչպես նաև ահաբեկչական կազմակերպության դեմ համակարգված գործողությունների ընթացքը:

Նշվում է նաև, որ հանդիպմանը Թուրքիայի արդարադատության նախարար Բեքիր Բոզդաղը Գյուլենի արտահանձման վերաբերյալ նոր փաստաթղթեր է փոխանցել ամերիկյան կողմին:

Բայդենի գրասենյակը, անդրադառնալով վերոնշյալ հանդիպմանը, հայտնել է, որ թուրքական կողմը այս անգամ Գյուլենի արտահանձնման պահանջի վերաբերյալ ուղարկել է ավելի ճշգրիտ ապացույցներ: Նշվում է, որ ԱՄՆ-ն իր աջակցությունն է հայտնում թուրքական իշխանությունների կողմից ռազմական հեղաշրջման փորձից հետո սկսված հետաքննությանը:

Աղբյուր` Ermenihaber.am