Թուրքիայի վարչապետը շնորհավորել է ռուս պաշտոնակցին

Քաղաքական14:03, 27 Սեպտեմբեր 2016

Թուրքիայի վարչապետը շնորհավորել է ռուս պաշտոնակցին

Թուրքիայի վարչապետ Բինալի Յըլդըրըմը հեռախոսազրույց է ունեցել Ռուսաստանի Դաշնության (ՌԴ) վարչապետ, «Միասնական Ռուսաստան» կուսակցության նախագահ Դմիտրի Մեդվեդևի հետ՝ շնորհավորելով նրան սեպտեմբերի 18-ին Պետական Դումայի ընտրություններում կուսակցության հաղթանակի կապակցությամբ: Ըստ թուրքական «Haberler» լրատվամիջոցի` այդ մասին պաշտոնապես տեղեկացվել է Թուրքիայի կառավարության կողմից:

Վարչապետ Յըլդըրըմը հիշեցրել է, որ հուլիսի 15-ին տեղի ունեցած ռազմական հեղաշրջման փորձից հետո Ռուսաստանը աջակցություն էր հայտնել Թուրքիայի կառավարությանը: Նշվում է, որ հեռախոսազրույցի ժամանակ կողմերը, անդրադառնալով ռուս-թուրքական հարաբերությունների կարգավորման և զարգացման գործընթացին, խոսել են նաև տարածաշրջանային մի շարք հարցերի`մասնավորապես սիրիական ճգնաժամի մասին:

Կողմերը պայմանավորվածություն են ձեռք բերել ռուս-թուրքական երկխոսության շարունակության վերաբերյալ:

Հիշեցնենք, որ սեպտեմբերի 18-ին Ռուսաստանի Պետական դումայի ընտրություններում հաղթանակ էր տարել իշխող «Միասնական Ռուսաստան» կուսակցությունը: Քվեաթերթիկների 90 տոկոսի հաշվարկից հետո իշխող կուսակցությունը ստացել էր ընտրողների ձայների 54.21 տոկոսը: Երկրորդ տեղում «Կոմունիստական կուսակցություն»-ն է, որը ստացել էր ձայների 13.53 տոկոսը:

Աղբյուր` Ermenihaber.am