Իրանի ԱԳ նախարարը անակնկալ այց է կատարել Թուրքիա

Քաղաքական09:17, 29 Սեպտեմբեր 2016

Իրանի ԱԳ նախարարը անակնկալ այց է կատարել Թուրքիա

Իրանի արտգործնախարար Ջավադ Զարիֆն արտասահմանյան այցից վերադառնալիս որոշել է ոչ պաշտոնական այց կատարել Թուրքիա:

Ըստ թուրքական «Haberturk» թերթի կայքի` Անկարայում Զարիֆը հանդիպել է թուրք պաշտոնակից Մևլութ Չավուշօղլուի հետ: Հաղորդվում է, որ հանդիպմանը քննարկվել են երկկողմ հարաբերությունների ու տարածաշրջանային խնդիրների հետ կապված թեմաներ:

Իրանի արտգործնախարարին ընդունել է նաև Թուրքիայի վարչապետ Բինալի Յըլդըրըմը: Հանդիպմանը Յըլդըրըմը կարևորել է ապրիլին Անկարայում անցկացված Իրան-Թուրքիա բարձր մակարդակի համագործացության խորհրդի 3-րդ նիստում ձեռք բերված համաձայնությունների կատարման շուրջ կոնկրետ քայլերի իրականացումը:

Այդ համատեքստում Թուրքիայի վարչապետը ցանկություն է հայտնել խորացնել համագործակցությունը Իրանի հետ էներգետիկայի, առևտրի տրանսպորտի ու բեռնափոխադրումների ոլորտում:

Զարիֆը նույնպես Թուրքիայի հետ բոլոր ոլորտներում համագործակցությունը խորացնելու և քաղաքական երկխոսությունը շարունակելու պատրաստակամություն է հայտնել:

Կողմերը տեսակետներ են փոխանակել տարածաշրջանային հարցերի, մասնավորապես` սիրիական հակամարտության վերաբերյալ:

Աղբյուր` Ermenihaber.am