Անկարայում Իրաքի դեսպանը կանչվել է Թուրքիայի արտգործնախարարւթյուն

Տարածաշրջան08:30, 05 Հոկտեմբեր 2016

Անկարայում Իրաքի դեսպանը կանչվել է Թուրքիայի արտգործնախարարւթյուն

Անկարայում Իրաքի արտակարգ և լիազոր դեսպան Հաշիմ Ալի Աքբար Իբրահիմ էլ Ալևին կանչվել է Թուրքիայի արտաքին գործերի նախարարություն: Ըստ թուրքական «Sondakika.com» լրատվական կայքի` դեսպանին կանչելու պատճառը երեկ Իրաքի խորհրդարանում ընդունված որոշումն է եղել, որում Թուրքիան մեղադրվում է այդ երկրի ինքնիշխանությունը խախտելու մեջ:

Իրաքի Մոսուլ քաղաքի մոտակայքում գտնվող Բաշիքա շրջանում թուրքական զորքերի առկայությունը անընդունելի համարող հայտարարության մեջ մասնավորապես ասվում է.

«Մեր ընդունած որոշումը նախատեսում է. Թուրքիայի դեսպանին կանչել Իրաքի ԱԳՆ և նոտա հղել, թուրքական զորքերը համարել օկուպանտ ուժեր և դրանց դուսբերման համար անհրաժեշտ միջոցներ ձեռք առնել, դատի տալ այն մարդկանց, որոնք պահանջել են թուրքական զորքերի մուտքը, դատապարտել և անընդունելի համարել Թուրքիայի նախագահ ռեջեփ Թայիփ Էրդողանի հայտարարությունները, վերանայել Թուրքիայի հետ առևտրային և տնտեսական հարաբերությունները, անհապաղ դիմել ՄԱԿ-ի անվտանգության խորհրդին թուրքական ուժերի դուրս բերման պահանջով, պահանջել կառավարությունից երկրի ինքնիշխանությունն ապահովելու նպատակով քաղաքական և դիվանագիտական քայլերի դիմել»:

Հիշեցնենք, որ 2015թ. դեկտեմբերի 10-ին թուրքական զորաջոկատներն առանց Իրաքի կենտրոնական իշխանությունների թույլտվության ներխուժել էին իրաքյան Քուրդիստանի Մոսուլ քաղաքից 30կմ հեռավորության վրա գտնվող Բաշիքա շրջան և հաստատվել ավելի վաղ թուրքերի կողմից հիմնած ռազմակայանում: Թուրքական կողմի պնդմամբ` իրենց զորախումբը նպատակ ունի մարզել իրաքյան Քուրդիստանի զինված ուժերի` Փեշմերգայի զորաջոկատները` «Իսլամական պետություն» (ԻՊ) ահաբեկչական կազմակերպության դեմ մղվող մարտերի համար:

Աղբյուր` Ermenihaber.am