Քրդերը Թուրքիայում սպանել են իշխող կուսակցության ևս մեկ առաջնորդի

Տարածաշրջան08:19, 11 Հոկտեմբեր 2016

Քրդերը Թուրքիայում սպանել են իշխող կուսակցության ևս մեկ առաջնորդի

Թուրքիայում ևս մեկ հարձակում է ունեցել իշխող «Արդարություն և զարգացում» կուսակցության (AKP-ԱԶԿ) վերնախավի ներկայացուցիչների դեմ:

Թուրքական «Doğan» լրատվական գործակալության տեղեկացմամբ՝ Դիարբեքիրի Դիջլե շրջանի ԱԶԿ շրջանային կառույցի նախագահ Դերյան Աքթերթը սպանվել է «Քուրդիստանի բանվորական կուսակցության» (ՔԲԿ-PKK) զինյալների կողմից:

ԱԶԿ Դիարբեքիրի պատգամավոր Էբուբեքիր Բալը նշել է, որ Աքթերթը ավելի վաղ ևս հարձակման էր ենթարկվել: ԱԶԿ շրջանային կառույցի նախագահը սպանվել է հոկտեմբերի 10-ին ժամը 23:00-ի սահմաններում՝ իրեն պատկանող բենզալցակայանում:Ըստ նախնական տեղեկությունների՝ Աքթերթի վրա հարձակվել են ՔԲԿ-ի 8 գրոհայիններ, որոնք սպանությունից հետո դիմել են փախուստի դեպի լեռներ:

Հանցագործներին բացահայտելու նպատակով լայնածավալ որոնողական աշխատանքներ են տարվում:

Հիշեցնենք, որ հոկտեմբերի 9-ի երեկոյան զինված հարձակման էր ենթարկվել նաև Վանի Օզալփ շրջանի ԱԶԿ շրջանային փոխնախագահ Այդըն Մուշթուն: Վերջինս սպանվել էր հենց սեփական տան դիմաց՝ ՔԲԿ-ի գրոհայինների կողմից:

Աղբյուր` Ermenihaber.am