Ռուսաստանը կարող է ավելի էժան բնական գազ մատակարարել Թուրքիային

Տնտեսական12:10, 11 Հոկտեմբեր 2016

Ռուսաստանը կարող է ավելի էժան բնական գազ մատակարարել Թուրքիային

Ռուսաստանը պատրաստվում է նվազեցնել Թուրքիային վաճառվող բնական գազի գինը: Ռուսաստանի էներգետիկայի նախարար Ալեքսանդր Նովակը հայտարարել է, որ «Գազպրոմ» ընկերությանը հրահանգվել է աշխատել գազի նպատակահարմար սակագնի սահմանման ուղղությամբ։ Այս մասին տեղեկացնում է թուրքական «Hürriyet» թերթի կայքը։

Լրագրողների հետ զրույցում Նովակը հայտնել է, որ այս պահին նոր սակագնի մասին որևէ կոնկրետ տվյալ նշել հնարավոր չէ, քանի որ ռուսական «Գազպրոմ» և թուրքական «BOTAŞ» ընկերությունների միջև թեմայի վերաբերյալ քննարկումները դեռևս շարունակվում են: Բնական գազի նոր սակագինը կհրապարակվի կողմերի միջև վերջնական պայմանավորվածության ձեռքբերումից հետո:

Ռուսաստանի էներգետիկայի նախարարը նշել է նաև, որ «Թուրքական հոսք» նախագծի շրջանակներում գազատարի 1-ին ճյուղի ծովային հատվածը կկառուցի ռուսական կողմը, իսկ ցամաքային հատվածը՝ թուրքական կողմի, ամենայն հավանականությամբ, «BOTAŞ»-ի ջանքերով։ Գազատարի 2-րդ ճյուղի կառուցումը ևս, հավանաբար, կկազմակերպվի համատեղ ջանքերով։ Իսկ 3-րդ և 4-րդ ճյուղերի կառուցման վերաբերյալ առայժմ որևէ քննարկում չի եղել։

Աղբյուր` Ermenihaber.am