Թուրքիայում կառավարման համակարգի փոփոխության համար հանրաքվեն կարող է անցկացվել ապրիլին

Տարածաշրջան11:14, 19 Հոկտեմբեր 2016

Թուրքիայում կառավարման համակարգի փոփոխության համար հանրաքվեն կարող է անցկացվել ապրիլին

Թուրքիայի իշխող «Արդարություն և զարգացում» կուսակցության (ԱԶԿ-AKP) փոխնախագահ Հայաթի Յազըջըն հայտնել է երկրում կառավարման համակարգի փոփոխության համար հանրաքվե անցկացնելու ժամկետը:

Ինչպես տեղեկացնում է թուրքական իշխանամետ «Sabah» պարբերականը, ԱԶԿ-ի փոխնախագահը նշել է, որ առաջարկը հնարավոր է մեջլիս ներկայացվի հունվարին:

Նրա տեղեկացմամբ՝ 12-15 կետից բաղկացած առաջարկը մեջլիսում հաստատվելուց հետո հանրաքվեն կարող է անցկացվել ապրիլին:

Թուրքիայում հաստատված է կառավարման խորհրդարանական համակարգ, որը փոխելու համար անհրաժեշտ է սահմանադրական փոփոխություններ իրականացնել: Կառավարման համակարգի փոփոխմամբ կընդլայնվեն նախագահ Ռեջեփ Թայիփ Էրդողանի լիազորությունները:

Սահամանդրական փոփոխությունների առաջարկը մեջլիսում անցկացնելու համար անհրաժեշտ է 330 ձայն: ԱԶԿ-ն մեջլիսում ունի 316 ձայն: Իշխող կուսակցությանը անհրաժեշտ է 14 քվե փոփոխությունները մեջլիսում հաստատելու, այնուհետև հանրաքվե անցկացնելու համար:

Աղբյուր` Ermenihaber.am