Թուրքական կործանիչները հարվածներ են հասցրել Սիրիայի քրդերի դիրքերին. Կան զոհեր

Տարածաշրջան07:23, 20 Հոկտեմբեր 2016

Թուրքական կործանիչները հարվածներ են հասցրել Սիրիայի քրդերի դիրքերին. Կան զոհեր

Թուրքիայի զինված ուժերը հայտարարել են «Եփրատի վահան» օպերացիայի շրջանակներում Սիրիայի քրդերի դիրքերը ռմբակոծելու մասին:

Ըստ թուրքական կողմի տվյալների` գործողության հետևանքով քրդերի շրջանում կա 160-200 զոհ:

Թուրքական «Sondakika.com» լրատվական կայքի հաղորդմամբ` ԶՈւ-ի հայտարարության մեջ նշվում է, որ երեկ երեկոյան 21:00-ից մինչև կեսգիշեր օդուժը ավիահարվածներ է հասցրել Սիրիայի քրդական «Ժողովրդավարական միություն կուսակցության» (ԺՄԿ-PYD) զինված ուժերի` ԺՊՈՒ (Ժողովրդի պաշտպանության ուժեր-YPG)` Հալեպի հյուսիսում գտնվող դիրքերին:

Ռմբակոծվել է ԺՊՈՒ-ի 18 հենակետ, որպես շտաբ կամ զինապահեստ օգտագործվող 9 շինություն ու բազմաթիվ տրանսպորտային միջոցներ:

Հիշեցնենք, որ Թուրքիայի բանակի ստորաբաժանումները և «Սիրիական ազատ բանակ» կոչվող ընդդիմադիր խմբավորման զինյալները օգոստոսի 24-ի առավոտյան ժամը 5-ի սահմաններում լայնամասշտաբ գործողություն էին սկսել ԻՊ-ի զինյալների կողմից վերահսկվող սիրիական Ջարաբլուս քաղաքում: Այդ օպերացիան ստացել էր «Եփրատի վահան» անունը: Չնայած, որ Թուրքիային սահմանակից սիրիական Ջերաբլուսը մաքրվել է ԻՊ-ի զինյալներից, այնումամենայնիվ թուրքական ուժերը դեռևս չեն շտապում լքել Սիրիայի տարածքը` գործողություններ իրականացնելով նաև տարածքի քրդական ուժերի դեմ:

Աղբյուր` Ermenihaber.am