Թուրքիան մտադիր է կառուցել աշխարհի ամենախոշոր արևային էլեկտրակայանը

Տնտեսական09:50, 21 Հոկտեմբեր 2016

Թուրքիան մտադիր է կառուցել աշխարհի ամենախոշոր արևային էլեկտրակայանը

Թուրքիայի էներգետիկայի և բնական պաշարների նախարար Բերաթ Ալբայրաքը հայտարարել է Քոնիայում խոշոր արևային էլեկտրակայան կառուցելու մասին:

Ըստ թուրքական «Memurlar.com.tr» լրատվական կայքի` Ալբայրաքը նշել է, որ կայանի կառուցման համար անհրաժեշտ կլինի 1.3 մլրդ դոլարի ներդրում:

Նշվում է, որ կայանն ի վիճակի կլինի բավարարել ավելի քան 600 հազար բնակարանի էներգետիկ կարիքները: Թուրք նախարարի խոսքով 1000 մեգավատ հզորությամբ կայանը ամենահզորն է լինելու աշխարհում իր տեսակի մեջ:

Առաջիկայում հայտարարվելիք աճուրդում կորոշվի, թե որ ընկերությունը կամ ընկերություններն են կառուցելու կայանը: Նշվում է, որ նախատեսվում է 2018-ի վերջերին ավարտին հասցնել կայանի շինարարությունը:

Ալբայրաքը տեղեկացրել է նաև 2017-ին տեղի ունենալիք մեկ այլ աճուրդի մասին, որտեղ էլ ընտրվելու է այն ընկերությունը, որը պետք է քամու էներգիայով աշխատող կայաններ կառուցի: Այլ մանրամասներ այդ նախագծի մասին թուրք նախարարը չի հաղորդել:

Աղբյուր` Ermenihaber.am