Զգուշացում Անկարային. Սիրիայի օդային տարածքը նորից խախտելու դեպքում թուրքական ինքնաթիռները կխոցվեն

Տարածաշրջան07:13, 21 Հոկտեմբեր 2016

Զգուշացում Անկարային. Սիրիայի օդային տարածքը նորից խախտելու դեպքում թուրքական ինքնաթիռները կխոցվեն

Սիրիական բանակը հայտարարել է, որ եթե Թուրքիայի օդուժը կրկին խախտի Սիրիայի օդային տարածքը, ապա իրենք կխոցեն թուրքական ռազմական ինքնաթիռները:

Նշյալ հայտարարությունն արվել է այն բանից հետո, երբ Թուրքիայի օդուժի կողմից հոկտեմբերի 20-ին Սիրիայի տարածքում քրդական ուժերի դեմ իրականացվել է օդային օպերացիա:

Միջանկյալ նշենք, որ հրթիռակոծվել էին Սիրիայի քրդական «Ժողովրդավարական միություն կուսակցության» (ԺՄԿ-PYD) ռազմական թև հանդիսացող «Ժողովրդի պաշտպանության ուժեր» (ԺՊՈՒ -YPG)-ի` Հալեպի հյուսիսում գտնվող դիրքերը: Գործողությունը տեղի էր ունեցել Թուրքիայի նախաձեռնած «Եփրատի վահան ռազմագործողության շրջանակներում»:

Թուրքական «Birgun» թերթի կայքը, հղում անելով Սիրիայի բանակի նշյալ հայտարարությանը, նշում է. «Եթե թուրքական կործանիչները կրկին փորձեն խախտել Սիրիայի օդային տարածքը, ապա մենք բոլոր հնարավոր միջոցները կկիրառենք դրանց ոչնչացնելու համար»:

Հիշեցնենք, որ ըստ թուրքական կողմի տվյալների` գործողության հետևանքով քրդերի շրջանում կար 160-200 զոհ:

Աղբյուր` Ermenihaber.am