Պենտագոնի ղեկավարը Թուրքիայում է

Տարածաշրջան13:22, 21 Հոկտեմբեր 2016

Պենտագոնի ղեկավարը Թուրքիայում է

ԱՄՆ-ի Պաշտպանության նախարար Էշթոն Քարտերը այցելել է Թուրքիայի մայրաքաղաք Անկարա, որտեղ հանդիպում է ունեցել Թուրքիայի նախագահ Ռեջեփ Թայիփ Էրդողանի, վարչապետ Բինալի Յըլդըրըմի և պաշտպանության նախարար Ֆիքրի Ըշըքի հետ և մի շարք այլ պաշտոնյաների հետ:

Ըստ թուրքական «Haberler» լրատվամիջոցի` թուրք պաշտոնյաների հետ հանդիպումների ժամանակ օրակարգային հարցերից է եղել Սիրիայում և Իրաքում ստեղծված իրավիճակ: Պենտագոնի ղեկավարը Ըշըքի հետ հանդիպման ժամանակ նշել է, որ իրենք աջակցում են «Իսլամական պետություն» ահաբեկչական կազմակերպության դեմ օպերացիաներում Թուրքիայի մասնակցությանը:

«Թուրքիայի հետաքրքրությունը Սիրիայի և Իրաքի զարգացումների նկատմամբ հասկանալի են: Մենք աջակցում ենք սահմանային անվտանգության պահպանման համար Ձեր կողմից ձեռնարկված միջոցները»,- ընդգծել է Քարտերը:

Հանդիպման ընթացքում Թուրքիայի Պաշտպանության նախարար Ֆիքրի Ըշըքը, անդրադառնալով Սիրիայի տարածքում Թուրքիայի կողմից օգոստոսի 24-ին սկսված «Եփրատի վահան» գործողությանը, նշել է, որ իրենք սպասում են, որ Սիրիայի քրդական ուժերը իրականացնեն իրենց տված խոստում և լքեն Եփրատի արևմտյան ափը:

Այցի շրջանակներում ԱՄՆ-ի պաշտպանության նախարարը դռնփակ հանդիպումներ է անցկացրել նախագահ Էրդողանի և վարչապետ Յըլդըրըմի հետ:

Աղբյուր` Ermenihaber.am