Թուրքիայում քննարկում են Իրաքի Բաշիքա շրջան հավելյալ զորախումբ ուղարկելու հնարավորությունը

Տարածաշրջան09:07, 27 Հոկտեմբեր 2016

Թուրքիայում քննարկում են Իրաքի Բաշիքա շրջան հավելյալ զորախումբ ուղարկելու հնարավորությունը

Իրաքի հյուսիսիսային Բաշիքա շրջանում Թուրքիայի կողմից հիմնված և առանց Իրաքի կենտրոնական իշխանությունների թույլտվության տեղակայված թուրքական զորախումբը կարող է համալրվել:

Ըստ թուրքական «Sondakika.com» լրատվական կայքի` եթե անարդյունք ավարտվեն այս պահին Թուրքիայի և Իրաքի միջև ռազմաճամբարի կարգավիճակի վերաբերյալ ընթացող բանակցությունները, այնտեղ գտնվող թուրք զինվորների անվտանգությունն ապահովելու նպատակով կուղարկվի լրացուցիչ զորախումբ:

Նշվում է, որ այս պահին Բաշիքայում գտնվում է 600-800 թուրք զինվորական:

Հիշեցնենք, որ 2015թ. դեկտեմբերի 10-ին թուրքական զորաջոկատներն առանց Իրաքի կենտրոնական իշխանությունների թույլտվության ներխուժել էին իրաքյան Քուրդիստանի Մոսուլ քաղաքից 30կմ հեռավորության վրա գտնվող Բաշիքա շրջան և հաստատվել ավելի վաղ թուրքերի կողմից հիմնած ռազմակայանում: Թուրքական կողմի պնդմամբ` իրենց զորախումբը նպատակ ունի մարզել իրաքյան Քուրդիստանի զինված ուժերի` Փեշմերգայի զորաջոկատները` «Իսլամական պետություն» (ԻՊ) ահաբեկչական կազմակերպության դեմ մղվող մարտերի համար:

Աղբյուր` Ermenihaber.am