Հանդիպել են Թուրքիայի և Ռուսաստանի ԶՈՒ գլխավոր շտաբերի պետերը

Տարածաշրջան09:02, 02 Նոյեմբեր 2016

Հանդիպել են Թուրքիայի և Ռուսաստանի ԶՈՒ գլխավոր շտաբերի պետերը

Թուրքիայի զինված ուժերի (ԶՈՒ) գլխավոր շտաբի պետ, բանակի գեներալ Հուլուսի Աքարը Մոսկվա կատարած այցի ընթացքում հանդիպել է ռուս պաշտոնակցի` Վալերի Գերասիմովի հետ:

Ըստ թուրքական «Star» թերթի կայքի` նրանք քննարկել են սիրիական ճգնաժամի կարգավորման հարցում Թուրքիայի և Ռուսաստանի համագործակցության հնարավորությունը (այդ թվում նաև Հալեպի մարդասիրական օգնություն տրամադրելու հարցում), դեռևս «Իսլամական պետություն» (ԻՊ) ահաբեկչական կազմակերպության վերահսկողության տակ գտնվող Մոսուլ քաղաքի ազատագրման խնդիրը, ինչպես նաև Թուրքիայի կողմից Սիրիայի տարածքում սկսած «Եփրատի վահան» գործողությունը:

Թուրքական «Milliyet» թերթն էլ տեղեկացնում է, որ Ռուսաստան կատարած այցի ժամանակ, Աքարին ուղեկցել է Թուրքիայի Ազգային հետախուզության ծառայության պետ Հաքան Ֆիդանը: Աղբյուրի համաձայն՝ հանդիպման ժամանակ թուրքական կողմը նաև բարձրացրել է այն հարցը, որ թուրքական օդուժը Սիրիայի հակաօդային պաշտպանության համակարգերի ակտիվացման հետևանքով հոկտեմբերի 22-ից մինչ օրս չի կարողանում օդային օպերացիա իրականացնել:

Աքարը նաև նշել է, որ Թուրքիան երբեք չի համագործակցի Սիրիայի քրդական Ժողովրդավարական միություն կուսակցությունը» (ԺՄԿ-PYD) ուժերի հետ: Վերոնշյալ հանդիպման մասին տեղեկությունը նաև հաստատել է Թուրքիայի ԶՈՒ գլխավոր շտաբի պաշտոնական կայքը:

Աղբյուր` Ermenihaber.am