Ռուսաստանում Թուրքիայի դեսպանատան դիմաց բողոքի ակցիա է անցկացվել

Քաղաքական09:38, 07 Նոյեմբեր 2016

Ռուսաստանում Թուրքիայի դեսպանատան դիմաց բողոքի ակցիա է անցկացվել

Մոսկվայում Թուրքիայի դեսպանատան դիմաց բողոքի ակցիա է անցկացվել: Ըստ թուրքական «Turkrus» լրատվական կայքի` ակցիայի մասնակիցները պահանջել են ազատ արձակել օրեր առաջ Թուրքիայում ձերբակալված ընդդիմադիր քրդամետ «Ժողովուրդների դեմոկրատական» (ԺԴԿ-HDP) կուսակցության պատգամավորներին: Ցուցարարները պարզել են պաստառներ, որոնց վրա ռուսերեն, քրդերեն և թուրքերեն լեզուներով գրված է եղել «Վերջ ահաբեկչությանը և ձերբակալություններին: Պատգամավորներին և քաղաքապետերին ազատություն»:

Մոսկվայի քաղաքային խորհրդի անդամ Դմիտրի Զախարովը հայտնել է, որ բողոքի ակցիան անցել է առանց միջադեպի:

Հիշեցնենք, որ Թուրքիայում նոյեմբերի 3-ին ձերբակալվել էին քրդամետ ընդդիմադիր «Ժողովուրդների դեմոկրատական կուսակցության» (ԺԴԿ-HDP) 11 պատգամավոր՝ այդ թվում կուսակցության համանախագահներ՝ Սելահաթթին Դեմիրթաշը և Ֆիգեն Յուքսեքդաղը:

Նրանք մեղադրվում են այն բանում, որ հրաժարվել էին անձեռնմխելիության վերացումից հետո իրենց նկատմամբ սկսված իրավական գործընթացի շրջանակներում ցուցմունք տալ:

Աղբյուր` Ermenihaber.am