Թուրքիան սեփական ՀՕՊ համակարգերի արտադրության հարցում պատրաստ է համագործակցել Ռուսաստանի հետ

Տարածաշրջան13:57, 08 Նոյեմբեր 2016

Թուրքիան սեփական ՀՕՊ համակարգերի արտադրության հարցում պատրաստ է համագործակցել Ռուսաստանի հետ

Թուրքիայի պաշտպանական արդյունաբերության վարչության ղեկավարի տեղակալ Իսմայիլ Դեմիրը հայտարարել է, որ ազգային հեռահար հակահրթիռային համակարգերի արտադրության հարցում իրենք պատրաստ են համագործակցել Ռուսաստանի և այլ երկրների հետ :

Ինչպես հաղորդում է թուրքական «Haberturk» լրատվական կայքը, Դեմիրը լրագրողների հետ զրույցում հիշեցրել է, որ ՀՕՊ համակարգի ստեղծման գործում ռուս-թուրքական համագործակցությունը առաջին անգամ քննարկվել է նախորդ ամսին Ստամբուլ քաղաքում 2 երկրների նախագահների հանդիպման ժամանակ:

Նա նշել է, որ չնայած Թուրքիան չեղյալ է հայտարարել 3 տարի առաջ հեռահար հակահրթիռային համակարգեր ձեռք բերելու համար կայացած աճուրդի արդյունքները, (խմբ.-այդ աճուրդում հաղթող էր ճանաչվել չինական «CPMIEC» կազմակերպությունը) այնուամենայիվ նախագիծը չեղարկված չէ:

Լրագրողները նաև Դեմիրին հարց են ուղղել, թե ինչպես կարձագանքի Թուրքիան, եթե Ռուսաստանը առաջարկարի իրենից գնել պատրաստի ՌԴ ԶՈւ հակաօդային պաշտպանության զենիթահրթիռային Ս-400 համակարգեր: Պատասխանելով հարցին Դեմիրը նշել է, որ հետագա աշխատանքները ցույց կտան, թե որը կլինի ամենաօպտիմալ տարբերակը:

Հիշեցնենք, որ Թուրքիայում հայտարարված մեծ հեռահարության ՀՕՊ համակարգի մրցույթի արդյունքներով որոշում էր կայացվել ձեռք բերել Չինաստանը ներկայացնող China Precision Machinery Export-Import Corp. (CPMIEC) ընկերության HQ-9 (FD-2000) զենիթահրթիռային կայանները:

Թուրքիայի` չինական արտադրության հեռահար ՀՕՊ համակարգեր գնելու փաստը հարուցել էր ԱՄն-ի և ՆԱՏՕ-ի անդամ մյուս երկրների դժգոհությունը: Վերջինները բազմիցս և տարբեր մակարդակներով հայտարարություններ էին արել՝ նշելով, որ չինական արտադրության համակարգերը չեն կարող ինտեգրվել ՆԱՏՕ-ի միասնական ՀՕՊ համակարգին, որին 2010-ից միացել է Թուրքիան:

Աղբյուր` Ermenihaber.am