Թուրքիայում սկսվել է ընդդիմադիր գործարարների որս

07:18, 08 Նոյեմբեր 2016

Թուրքիայում սկսվել է ընդդիմադիր գործարարների որս

Թուրքիայի Սիվաս (Սեբաստիա) նահանգի տարբեր շրջաններից 31 գործարարի բերման ենթարկելու և ձերբակալելու որոշում է կայացվել: Ըստ թուրքական «Sabah» թերթի կայքի` նրանք մեղադրվում են «Ֆեթհուլլահական ահաբեկչական խմբավորում» (FETÖ), կամ «զուգահեռ կառույց» անվամբ հայտնի գյուլենական համայնքին աջակցելու և ֆինանսավորելու մեջ: Նշյալ 31 գործարարներից 27-ին արդեն իսկ բերման են ենթարկել:

Աղբյուրը տեղեկացնում է, որ այժմ աշախատանքներ են տարվում մյուս 4 գործարարին կալանավորելու նպատակով:

Հիշեցնենք, որ Թուրքիայում ազդեցիկ լծակների տիրապետող Գյուլենի հետևորդները, ում մեղադրում են հուլիսի 15-ին Թուրքիայում իրականացված ռազմական հեղաշրջման փորձը կազմակերպելու մեջ, ներգրավված են եղել հատկապես դատական համակարգում և ուժային կառույցներում: 2013թ. վերջում Թուրքիայում ծագած կոռուպցիոն սկանդալից հետո իշխանությունները սկսել են ամբողջ համակարգը գյուլենականներից «մաքրելու» գործընթաց: Երկրում պարբերաբար իրականացվում են ոստիկանական հատուկ գործողություններ «Զուգահեռ կառույցի» դեմ: Թուրքական իշխանական մամուլը «Գյուլենական համայնքն» անվանում է նաև «Զուգահեռ կառույց» և ասոցացնում ահաբեկչության հետ:

Աղբյուր` Ermenihaber.am