Թուրքիայի գլխավոր ընդդիմադիր ուժը բողոքի ցույցեր է կազմակերպելու

Քաղաքական13:23, 17 Նոյեմբեր 2016

Թուրքիայի գլխավոր ընդդիմադիր ուժը բողոքի ցույցեր է կազմակերպելու

Թուրքիայի գլխավոր ընդդիմադիր ուժ համարվող քեմալականների «Ժողովրդահանրապետական կուսակցությունը» (CHP-ԺՀԿ) դեմ է երկրում կառավարման նախագահական համակարգի հաստատմանը: Այդ նպատակով ԺՀԿ-ն պատրաստվում է բողոքի ցույցեր կազմակերպել:

Ինչպես տեղեկացնում է թուրքական «Internethaber» լրատվական կայքը, այս մասին կուսակցության ժողովից հետո հայտարարել է կուսակցության փոխնախագահ Հալուք Քոչը: Բողոքի ցույցերն անցնելու են «Թույլ չենք տա, որ Թուրքիան մասնատվի» կարգախոսի ներքո:

Քոչը նաև տեղեկացրել է, որ առաջին ցույցը կազմակերպվելու է դեկտեմբերի 3-ին Ադանա քաղաքում:

Հիշեցնենք, որ իշխող «Արդարություն և զարգացում» կուսակցությունն (ԱԶԿ-AKP) արդեն ներկայացրել է սահմանադրական փոփոխությունների նախագծի նախնական տարբերակը, որի հիմնական մասը վերաբերում է կառավարման համակարգի փոփոխմանը:

Սահմանադրական փոփոխությունների նախագիծը մեջլիսում անցկացնելու համար անհրաժեշտ է 330 ձայն, այնինչ ԱԶԿ-ն ունի 316 մանդատ: Իշխող կուսակցությունը նախագիծն խորհրդարանում անցկացնելու և հանրաքվեի դնելու նպատակով բանակցություններ էր սկսել «Գորշ գայլերի» քաղաքական թևի՝ ԱՇկ-ի հետ:

Աղբյուր` Ermenihaber.am