Թուրք-սիրիական սահմանին Սիրիայի քրդական ուժերը իրենց դրոշն են բարձրացրել

Տարածաշրջան13:23, 05 Դեկտեմբեր 2016

Թուրք-սիրիական սահմանին Սիրիայի քրդական ուժերը իրենց դրոշն են բարձրացրել

Թուրքիայի Շանլըուրֆա նահանգի (պատմ. Ուրֆա, Եդեսիա) Աքչաքալե շրջանին սահմանակից սիրիական Թելաբյադ շրջանում Սիրիայի քրդական «Ժողովրդավարական միություն» (ԺՄԿ-PYD) կուսակցության անդամների կողմից բարձրացվել է իրենց ռազմական թևի` «Ժողովրդական ինքնապաշտպանական ջոկատներ» (ԺԻՋ-YPG) –ի մեծ դրոշը:

Թուրքական «Haberler» լրատվամիջոցը նկատել է տալիս, որ այդ ամենը տեղի է ունենում այն ժամանակ, երբ անվտանգության նկատառումներից ելնելով` թուրք-սիրիական սահմանին շարունակվում է բետոնե պատի շինարարությունը: Ընդ որում դա տեղի է ունենում Թուրքիայի նախաձեռնությամբ:

Հիշեցնենք, որ Թուրքիան ավելի վաղ որոշում էր կայացրել Սիրիայի սահմանին «անվտանգության պատ» կոչվող նախագծի ընթացքի արագացման վերաբերյալ, որի շրջանակներում Սիրիայի սահմանին արդեն կառուցված 200կմ երկարությամբ պատին ավելացվելու է ևս 700կմ: Նշյալ ծրագրով`նախատեսվում է ամբողջությամբ ծածկել Թուրքիայի` Սիրիայի հետ ունեցած 911կմ երկարությամբ սահմանը:

Պաշտոնական Անկարան թե Սիրիայի քրդական ուժերին, թե «Քուրդիստանի բանվորական կուսակցության» (ՔԲԿ-PKK)-ը դիտարկում է, որպես ահաբեկչական կազմակերպություններ:

Աղբյուր` Ermenihaber.am