Թուրքիայի վարչապետը մանրամասներ է ներկայացրել սահմանադրական փոփոխությունների վերաբերյալ

Քաղաքական09:05, 06 Դեկտեմբեր 2016

Թուրքիայի վարչապետը մանրամասներ է ներկայացրել սահմանադրական փոփոխությունների վերաբերյալ

Թուրքիայի վարչապետ Բինալի Յըլդըրըմը Ռուսաստան մեկնելուց առաջ լրագրողների հետ հանդիպմանը որոշ մանրամասներ է ներկայացրել սպասվող սահմանադրական փոփուխությունների դրույթների վերաբերյալ:

Ըստ թուրքական «Doğan» լրատվական գործակալության` Յըլդըրըմը նշել է, որ փոփոխության է ենթարկվելու հիմնական 12 հոդված, որոնց ազդեցությամբ կփոխվեն նաև բազմաթիվ այլ դրութներ: Օրինակ՝ նոր սահմանադրությամբ նախատեսվում է հանել վարչապետի պաշտոնը և ներդնել երկրի փոխնախագահի պաշտոնը:Թուրքիայի վարչապետը հայտնել է, որ վերացվելու է նաև արտակարգ դրության մասին հոդվածը: Այն կկարգավորվի նոր սահմանադրության մեջ ներառված այլ դրույթներով, որոնք իրավիճակին համապատասխան միջոցների կիրառում են ենթադրում:

«Կան նաև ժամանակավոր և անցումային դրույթներ, որոնց վրա այս պահին աշխատանքներ են տարվում: Առաջին գործը լինելու է փաթեթը մեջլիսին ներկայացնելը: Դա կանենք հավանաբար այս շաբաթվա ընթացքում»,- նշել է Յըլդըրըմը:

Վերջինս տեղեկացրել է, որ նոր սահմանադրությամբ հանվում է նաև հանրապետության նախագահի` կուսակցական գործունեություն ծավալելու արգելքը:

Նոր սահմանադրության մեջ համապատասխան հոդվածներ կան, որոնք կանխելու են տարադրամի փոխարժեքի տատանումներից փոքր ու միջին ձեռնարկատիրության կրելիք վնասները:

Աղբյուր` Ermenihaber.am