Էրդողանը խոսել է PKK-ի և թուրք ուժայինների կորուստների մասին

Տարածաշրջան13:00, 14 Դեկտեմբեր 2016

Էրդողանը խոսել է PKK-ի և թուրք ուժայինների կորուստների մասին

Թուրքիայի նախագահ Ռեջեփ Թայիփ Էրդողանը հայտարարել է, որ թուրք ուժայինների կողմից երկրի ներսում, ինչպես նաև դրա սահմաններից դուրս «Քուրդիստանի բանվորական կուսակցության» (ՔԲԿ-PKK) դեմ իրականացվող ռազմագործողությունների ընթացքում արդեն սպանվել է շուրջ 9.500 քուրդ զինյալ: Ըստ թուրքական «Haberler» լրատվամիջոցի` այս մասին երկրի նախագահը հայտնել է տեղական ինքնակառավարման մարմինների ղեկավարների հետ հանդիպման ժամանակ:

Նա նաև նշել է, որ PKK-ի հետ կապ ունենալու մեղադրանքով մինչև հիմա բերման է ենթարկվել 40.000 մարդ: Նրանցից 10.500-ը ձերբակալվել են: Իսկ «Ֆեթհուլլահական ահաբեկչական խմբավորում» (FETÖ) կամ «զուգահեռ կառույց» անվամբ հայտնի գյուլենական համայնքի անդամների դեմ իրականացված օպերացիաների հետևանքով ձերբակալվածների թիվը արդեն անցել է 40 հազարը:

Վերոնշյալից բացի Էրդողանը խոսել է Թուրքիայի Ստամբուլում տեղի ունեցած ահաբեկչական հարձայման մասին: Պայթյունների հետևանքով եղել է 44 զոհ, որից 37-ը՝ ոստիկաններ:

Իսկ PKK-ի դեմ վերջին գործողությունների ժամանակ սպանվել է 178 թուրք զինվոր և ոստիկան: «Իսլամական պետություն» (ԻՊ) ահաբեկչական կազմակերպության դեմ մարտերում թուրքական կողմը մինչ այժմ ունի մոտ 33 կորուստ, իսկ «Եփրատի վահան» օպերացիայի ընթացքում թուրքական կողմը մինչ այժմ ունեցել է 17 սպանված:

Հուլիսի 15-ին Թուրքիայում տեղի ունեցած ռազմական հեղաշրջման փորձի հետևանքով էլ եղել է 248 զոհ:

Աղբյուր` Ermenihaber.am