Թուրքիայում գործազրկությունը աճել է՝ հասնելով 11.3 տոկոսի

Տնտեսական08:38, 15 Դեկտեմբեր 2016

Թուրքիայում գործազրկությունը աճել է՝ հասնելով 11.3 տոկոսի

Թուրքիայում գործազրկության մակարդակը աճել է: Թուրքական «Haberler.com» լրատվակայքի տեղեկացմամբ՝ Թուրքիայի վիճակագրական ընկերությունը զեկույց է հրապարակել 2016թ. սեպտեմբերի դրությամբ աշխատանքային ներուժի վիճակի վերաբերյալ:

Ըստ զեկույցի՝ անցյալ տարվա նույն ժամանակահատվածի համեմատ գործազրկությունը Թորքիայում աճել է 1 միավորով՝ կազմելով 11.3 տոկոս: Ընդ որում, 15-24 տարեկանների շրջանում գործազրկությունը աճել է 1,4 միավորով՝ հասնելով 19.9 տոկոսի:

15 տարեկանից բարձր տարիքային խմբին պատկանող գործազուրկների թիվը ողջ երկրում կազմել է 3.523.000, ինչը 420.000-ով գերազանցում է նախորդ տարվա ցուցանիշը:

2015թ. սեպտեմբերի համեմատ 408.000-ով աճել է աշխատանք ունեցողների թիվը՝ կազմելով 27.564.000, ինչը կազմում է երկրի բնակչության 46.8 տոկոսը: Ընդ որում, գյուղատնտեսության ոլորտում աշխատողների թիվն այս ժամանակահատվածում նվազել է 168.000-ով, իսկ ոչ գյուղատնտեսական ոլորտում աշխատողների թիվն աճել է 576.000-ով:

Աշխատանք ուենցողների 20.5 տոկոսը ներգրավված է գյուղատնտեսական ոլորտում, 19.1 տոկոսը՝ արդյունաբերության, 7.7 տոկոսը՝ շինարարության, 52.7 տոկոսը՝ սպասարկման ոլորտում:

2016թ. սեպտեմբերի դրությամբ 828.000-ով աճել է բնակչության աշխատանքային ներուժը՝ հասնելով 31.087.000-ի, ինչը կազմում է երկրի բնակչության 52.8 տոկոսը:

Աղբյուր` Ermenihaber.am