Անկարայում սպանվել է Ռուսաստանի դեսպանը (տեսանյութ) (ԹԱՐՄԱՑՎՈՂ)

Տարածաշրջան17:23, 19 Դեկտեմբեր 2016

Անկարայում սպանվել է Ռուսաստանի դեսպանը (տեսանյութ) (ԹԱՐՄԱՑՎՈՂ)

Անկարայում սպանվել է Թուրքիայում Ռուսաստանի արտակարգ և լիազոր դեսպան Անդրեյ Կառլովը։ Ինչպես տեղեկացնում է թուրքական «Hurriyet» թերթը, ռուս դեսպանի վրա հարձակումը կատարվել է Անկարայում ժամանակակից արվեստների կենտրոնում, որտեղ տեղի էր ունենում «Ռուսաստանը՝ Կալինինգրադից մինչև Կամչատկա, զբոսաշրջիկի աչքերով» լուսանկարչական ցուցահանդեսի պաշտոնական բացումը։

Հարձակումն իրականցրած անձը թանգարան է մտել իրավապահ ներկայանալով։ Ըստ ականատեսների՝ նա Կարլովի ելույթի ժամանակ նախ օդ է կրակել, ապա մեջքից կրակել է դեսպանի վրա։ Մարդասպանը բղավոցով վանկարկել է «Ալլահ աքբար, չմոռանաք Հալեպը, չմոռանաք Սիրիան»: Նշվում է, որ մարդասպանը վնասազերծվել է։

Թուրքական իշխանամետ «Sabah» թերթն ուշադրություն է հրավիրում այն հանգամանքի վրա, որ հարձակումը կատարվել է, երբ Թուրքիայի, Ռուսաստանի և Իրանի ներկայացուցիչները պետք է հանդիպեին սիրիական ճգնաժամի ու մասնավորապես Հալեպում ստեղծված իրավիճակին լուծումներ գտնելու համար։

Տ Ե Ս Ա Ն ՅՈւ Թ

Թ ԱՐ Մ Ա Ց Վ Ո Ղ

Ներքին գործերի նախարար Սուլեյման Սոյլուն լրագրողներին հայտնել է, որ ռուս դեսպանին սպանած անձը Անկարայի ոստիկանական բաժնի աշխատակից 22-ամյա Մևլյութ Մերթ Ալթընթաշն է եղել:

Թուրքիայի նախագահ Ռեջեփ Թայիփ Էրդողանը զանգահարել է ռուս գործընկերոջը՝ ՌԴ նախագահ Վլադիմիր Պուտինին և տեղեկություններ հաղորդել դեսպանի սպանության վերաբերյալ:

Թուրքիայի վարչապետ Բինալի Յըլդըրըմը հանդես է եկել գրավոր հայտարարությամբ, որում մասնավորապես ասված է, որ այդ զազրելի սպանությունը չի կարող խաթարել ռուս-թուրքական հարաբերությունների զարգացմանը:

Հայտարարություն է տարածել նաև Թուրքիայի արտաքին գործերի նախարարությունը՝ վստահեցնելով, որ միջադեպը ստվեր չի նետի ռուս-թուրքական հարաբերությունների վրա:

«Ահաբեկչությունը ցույց տվեց իր նողկալի երեսը: Մենք դատապարտում ենք այդ հարձակումը: Ամենակարճ ժամկետում պատասխանատուները կկանգնեն թուրքական արդարադատության առաջ»:

Թուրքիայի պաշտպանության նախարար Ֆիքրի Ըշըքը արձագանքել է դեսպանի սպանությանը՝ ասելով. «Խստագույնս դատապարտում եմ Անդրեյ Կարլովի կյանքը խլած ահաբեկչական հարձակումը»:

Թուրքիայի նախագահ Էրդողանը ռուս դեսպանի սպանությունը որակել է որպես սադրիչ գործողություն:

«Ռուսաստանի հետ հարաբերությունները մեզ համար շատ-շատ կարևոր են: Տարածաշրջանի համար շատ-շատ կարևոր են: Դիմում եմ այդ հարաբերությունները փչացնել ջանացողներին. դուք երբեք չեք տեսնելու ձեր սպասելիքների իրականացումը: Իզուր եք սպասում, իզուր եք սպասելու»:

Աղբյուր` Ermenihaber.am