Թուրքիան և Իսրայելը մտադիր են ընդլայնել ազատ առևտրի մասին պայմանագիրը

Տարածաշրջան08:24, 11 Հունվար 2017

Թուրքիան և Իսրայելը մտադիր են ընդլայնել ազատ առևտրի մասին պայմանագիրը

Թուրք-իսրայելական հարաբերությունների կարգավորման գործընթացում նոր զարգացումներ են սպասվում: Թուրքական իշխանամետ «Sabah» թերթի կայքի տեղեկացմամբ՝ երկու երկրների հարաբերությունների բարելավման ուղղությամբ աշխատանքներ են տարվում: Նախատեսվում է ընդլայնել երկու երկրների միջև ազատ առևտրի մասին պայմանագիրը: Այդ նպատակով փետրվարին բարձր մակարդակի փոխադարձ այցելություններ կկազմակերպվեն:

Նշվում է, որ թուրք պաշտոնյաների այցը նախատեսվում է փետրվարի 7-ից 8-ը:

Հիշեցնենք, որ Թուրքիայի և Իսրայելի հարաբերությունները սրվել էին «Մավի Մարմարա» նավի միջադեպից հետո: Իսրայելցի զինվորները 2010 թ-ի մայիսի 31-ին հարձակվել էին թուրքական «Մավի Մարմարա» նավի վրա, որը միջազգային մարդասիրական նավաշարասյան կազմում օգնություն էր փոխադրում Պաղեստինի Գազայի հատված: Թել Ավիվը պահանջել էր նավի վրա բեռների ստուգում անցկացնել: Երբ նավի անձնակազմը հրաժարվել էր ենթարկվել պահանջին, իսրայելցի զինվորների հարձակման էին անցել: Հարձակման հետևանքով զոհվել էր Թուրքիայի 10 քաղաքացի:

Երկարատև բանակցություններից հետո Թուրքիայի մեջլիսը 2016թ օգոստոսի 20-ին հաստատել էր երկու երկրների միջև հարաբերությունների կարգավորման համաձայնագիրը հաստատող օրենքը: Այն պաշտոնապես ուժի մեջ էր մտել օգոստոսի 31-ից, երբ նախագահ Ռեջեփ Թայիփ Էրդողանը ստորագրել էր մեջլիսի որոշումը:

Աղբյուր` Ermenihaber.am