Իզմիրում պայթյունի պատասխանատվությունը ստանձնել են «Քուրդիստանի ազատության բազեները»

Տարածաշրջան09:55, 11 Հունվար 2017

Իզմիրում պայթյունի պատասխանատվությունը ստանձնել են «Քուրդիստանի ազատության բազեները»

Թուրքիայի Իզմիր քաղաքի արդարադատության պալատի դիմաց տեղի ունեցած պայթյունի և դրան հաջորդած զինված բախման պատասխանատվությունը ստանձնել է «Քուրդիստանի ազատության բազեներ» (TAK-ՔԱԲ) զինյալ խմբավորումը:

Հիշեցնենք, որ հունվարի 5-ին Իզմիր արդարադատության պալատի առջև 3 անհայտ անձիք նախ պայթեցրել էին ռումբերով բեռնված մեքենան, ապա զինված բախման մեջ մտել անվտանգության ուժերի հետ:

Դեպքի հետևանքով սպանվել էր 2 հոգի, որոնցից մեկը ոստիկան էր, մյուսը` արդարադատության պալատի աշխատակից: Եվս 10-ը վիրավորվել էին:

Պայթյունն իրականացնողներից 2-ը սպանվել էին անվտանգության ուժերի հետ բախման ժամանակ, 3-րդը դեպքի վայրից դիմել էր փախուստի:

Նշենք նաև, որ TAK-ը պատասխանատվություն էր ստանձնել նաև դեկտեմբերին Ստամբուլի Բեշիքթաշ թաղամասում 45 մարդու և Կայսերիում 14 զինվորականի մահվան պատճառ դարձած ահաբեկչությունների համար:

Թուրքական կողմի պնդման համաձայն` TAK-ը հանդիսանում է «Քուրդիստանի բանվորական կուսակցության» (ՔԲԿ-PKK) թևերից մեկը, բայց PKK-ի ղեկավարները հերքում են նշյալ պնդումը:

Աղբյուր` Ermenihaber.am