Անկարայի քաղաքապետը լրագրողին վիրավորած Թրամփին նմանեցրել է Էրդողանին

Քաղաքական08:34, 13 Հունվար 2017

Անկարայի քաղաքապետը լրագրողին վիրավորած Թրամփին նմանեցրել է Էրդողանին

Անկարայի քաղաքապետ Մելիհ Գյոքչեքը մեծապես «տպավորվել» է ԱՄՆ նորընտիր նախագահ Դոնալդ Թրամփի՝ լրագրողների նկատմամբ կոպիտ վերաբերմունքից: Թուրքական «Sondakika.com» լրատվակայքի տեղեկացմամբ՝ Թրամփը իր առաջին մամուլի ասուլիսի ժամանակ վիրավորել է «CNN»-ի թղթակիցներից մեկին: ԱՄՆ նախագահի այս պահվածքից ոգեշնչված Գյոքչեքը թվիթերյան իր միկրոբլոգում գրել է. «Թրամփի այս պահվածքը նման է մեր նախագահին»:

Թրամփի և CNN -ի թղթակցի միջև տեղի ունեցած միջադեպը լայն արձագանք է գտել Թուրքիայում: Նախագահ Էրդողանը երեկվա իր ելույթում նույնպես անդրադարձել է դեպքին՝ արդարացի համարելով ԱՄՆ նախագահի պահվածքը:

Նշենք, որ նախօրեին տեղի ունեցած մամուլի ասուլիսի ժամանակ CNN-ի թղթակիցը ցանկացել է հարց ուղղել նորընտիր նախագահին: Սակայն Թրամփը թույլ չի տվել՝ ասելով. «Խնդրում եմ, լռեք, դուք անհարգալից եք: Դուք կեղծ լուրեր հրապարակող կազմակերպություն եք: Ես ձեզ հարց տալու իրավունք չեմ տալիս»: Ի պատասխան լրագրողի բողոքին, թե դա հարձակում է CNN -ի դեմ, Թրամփը պատասխանել է, որ CNN-ը «թշվառ կառույց է»:

Աղբյուր` Ermenihaber.am