Թուրքիայի մեջլիսում ծեծկռտուքից հետո անհետացել է 15.000 եվրո արժողությամբ բարձրախոսը

Տարածաշրջան07:43, 13 Հունվար 2017

Թուրքիայի մեջլիսում ծեծկռտուքից հետո անհետացել է 15.000 եվրո արժողությամբ բարձրախոսը

Թուրքիայի ազգային մեծ ժողովում (մեջլիս) հունվարի 11-ին սահմանադրական փոփոխությունների քննարկումների ընթացքում տեղի ունեցած ծեծկռտուքի ժամանակ կորել է ամբիոնի 15-ական հազար եվրո արժողությամբ 2 բարձրախոսներից մեկը: Ըստ թուրքական «Sondakika.com» լրատվական կայքի` ենթադրվում է, որ բարձրախոսը ծեծկռտուքի մասնակից պատգամավորների կողմից որպես մահակ է օգտագործվել, սակայն որևէ կերպ չի հաջողվում պարզել, թե որտեղ է այն հայտնվել կռվից հետո:

Նշվում է, որ կռվի ընթացքում լրջորեն վնացվել ու ամրացված տեղից պոկվել է նաև խորհրդարանի 250 կգ կշռող քարե ամբիոնը, որն արդեն վերանորոգվել ու կրկին ամրացվել է հին տեղում:

Հիշեցնենք, որ նախօրեին Թուրքիայի խորհրդարանում սահմանադրական փոփոխությունների հոդվածների քննարկման ժամանակ լարվածություն է առաջացել ընդդիմադիր «Ժողովրդահանրապետական կուսակցության» և իշխանական «Արդարություն և զարգացում կուսակցության» պատգամավորների միջև, ինչը րոպեների ընթացքում վերածվել է զանգվածային ծեծկռտուքի:

Միջադեպի ժամանակ կոտրվել է ԱԶԿ-ի պատգամավոր, կուսակցության փոխնախագահ Ֆաթիհ Շահինի քիթը, որոշ պատգամավորներ էլ ստացել են թեթև վնասվածքներ: