Թուրքիայում գրանցվել է գործազրկության ամենաբարձր ցուցանիշը 2010-ից ի վեր

Տնտեսական08:52, 16 Հունվար 2017

Թուրքիայում գրանցվել է գործազրկության ամենաբարձր ցուցանիշը 2010-ից ի վեր

Թուրքիայում վերջին շրջանում նկատվող գործազրկության աճի միտումը շարունակվում է: Ըստ Թուրքիայի վիճակագրական ծառայության` 2016-ի հոկտեմբերի համար հրապարակած տվյալների` նախորդ տարվա (2015) նույն ժամանակահատվածի համեմատ գործազրկության մակարդակը բարձրացել է 1.3%-ով` հասնելով 11.8-ի: Համապատասխանաբար գործազուրկների թիվն էլ ավելացել է 500.000-ով` հասնելով 3.647.000-ի:

Ըստ թուրքական «Sondakika.com» լրատվական կայքի` սա 2010-ի մարտից ի վեր գրանցված գործազրկության ամենաբարձր ցուցանիշն է:

Ըստ հրապարակված տվյալների` նախորդ տարվա նույն ժամանակահատվածի համեմատ չի փոխվել աշխատատեղերի քանակը` մնալով 46.2%-ի մակարդակում:

Գյուղատնտեսական ոլորտում աշխատողների թիվը նվազել է 168.000-ով, իսկ ոչ գյուղատնտեսական ոլորտներում` ավելացել 579.000-ով: Ընդհանուր աշխատուժը նախորդ տարվա նույն ժամանակահատվածի համեմատությամբ ավելացել է 911.000-ով` տոկոսային հարաբերությամբ աճելով 0.8-ով:

0.3%-ով էլ ավելացել է չգրանցված աշխատողների քանակը` հասնելով 33.9%-ի:

Աղբյուր` Ermenihaber.am