«Թուրքիան կործանման եզրին է». ընդդիմադիր գործիչը՝ սահմանադրական փոփոխությունների մասին

Քաղաքական08:25, 20 Հունվար 2017

«Թուրքիան կործանման եզրին է». ընդդիմադիր գործիչը՝ սահմանադրական փոփոխությունների մասին

Թուրքիայի ընդդիմադիր «Ժողովրդահանրապետական» (ԺՀԿ-CHP) կուսակցության փոխնախագահ Չեթին Օսման Բուդաքը մտահոգություն է հայտնել մեջլիսում քննարկման դրված սահմանադրական փոփոխությունների առիթով: Թուրքական պետական «Anadolu» լրատվական գործակալության փոխանցմամբ՝ թեմայի վերաբերյալ իր հրապարակած գրավոր հայտարարության մեջ Բուդաքը նշել է, որ Թուրքիայի ազգային մեծ ժողովի (ԹԱՄԺ-TBMM) գլխավոր խորհրդի քննարկումներին մասնակցող բոլոր պատգամավորները շատ մեծ պատասխանատվության են կրում:

ԺՀԿ փոխնախագահի պնդմամբ՝ սահմանադրական փոփոխությունների հաստատման դեպքում նախագահին կտրվի գործադիր և օրենսդիր մարմնի, ինչպես նաև՝ դատական համակարգի չափից դուրս շատ լիազորություններ: Միևնույն ժամանակ նրա գործունեության գրեթե անհնար կլինի որևէ կերպ վերահսկել:

«Այդքան լայն իրավասությունների՝ մեկ անձի ձեռքում կենտրոնացումը վերջ կտա ուժերի բաշխմանը: Ակնհայտ է, որ այնտեղ, որտեղ չկա ուժերի հակակշռող բաշխում, չի լինի նաև իրավունք և ժողովրդավարություն: Թուրքիան կործանման եզրին է», -ասել է Բուդաքը:

Նա կոչ է արել մեջլիսի պատգամավորներին՝ քվեարկելիս ողջախոհություն դրսևորել, քանի որ նրանց ընտրությամբ վճռվելու է Թուրքիայի և նրա ժողովրդի ճակատագիրը:

ԺՀԿ փոխնախագահը հավելել է նաև, որ ըստ կատարված ուսումնասիրությունների, Թուրքիայի բնակչության մեծ մասը տեղյակ չէ սահմանադրական փոփոխությունների բուն բովանդակությունից: Բնակչությունը բավարար չափով չի տեղեկացվում խորհրդարանում ընթացող քննարկումների մասին:

Աղբյուր` Ermenihaber.am