Թուրքիայի ՆԳՆ. «5 ամսում PKK-ի հետ կապ ունենալո մեղադրանքով 2.603 մարդ է կալանավորվել»

Տարածաշրջան10:03, 13 Փետրվար 2017

Թուրքիայի ՆԳՆ. «5 ամսում PKK-ի հետ կապ ունենալո մեղադրանքով 2.603 մարդ է կալանավորվել»

Թուրքիայի ներքին գործերի նախարար Սուլեյման Սոյլուն Ադըյամանում ունեցած ելույթի ժամանակ տվյալներ է ներկայացրել վերջին 5 ամսվա ընթացքում «Քուրդիստանի բանվորական կուսակցության» (PKK-ՔԲԿ) նկատմամբ պետության իրականացրած գործողությունների վերաբերյալ:

Ըստ թուրքական «Diken.com» լրատվական կայքի` Սոյլուն հայտնել է, որ նշյալ ժամանակահատվածում թուրքական պետության կողմից ահաբեկչական կազմակերպություն դիտարկվող կուսակցության հետ կապ ունենալու համար 8.477 մարդ է ձերբակալվել, որոնցից 2.603-ը կալանավորվել են:

Թուրք պաշտոնյան հայտարարել է, որ PKK-ի նկատմամբ իրականացված 129 հատուկ գործողությունների ընթացքում երկրի 22 քաղաքում 661 կասկածյալ է ոչնչացվել, ևս 689-նն էլ սպանվել է դաշտային կամ անտառային պայմաններում անվտանգության ուժերի հետ բախումների ընթացքում:

Ըստ Սոյլուի` PKK-ին ֆինանսական և լոգիստիկ օժանդակություն ցուցաբերելու համար քրդաբնակ շրջաններում պետության կողմից պաշտոնանկ են արվել 79 քաղաքի ու շրջանի ղեկավար, որոնց փոխարեն նշանակվել են պետական կառավարիչներ:

Թուրքիայի ներքին գործերի նախարարը տեղեկացրել է նաև, որ քրդական կազմակերպության դեմ պայքարն ավելի ուժեղացնելու նպատակով շարունակվում են պետության կողմից նախաձեռնված ոստիկանության, ժանդարմերիայի, առափնյա անվտանգության ուժերի և անտանգության աշխատակիցների անձնակազմերի համալրումը:

Աղբյուր` Ermenihaber.am