Գերմանացի նախարարը հորդորել է Թուրքիային վերանայել մարդու իրավունքների հարցում իր դիրքորոշումը

Քաղաքական13:54, 03 Մարտ 2017

Գերմանացի նախարարը հորդորել է Թուրքիային վերանայել մարդու իրավունքների հարցում իր դիրքորոշումը

Գերմանիայի Արդարադատության նախարար Հեյկո Մաասը թուրք գործընկերոջը Բոզդաղին հղած նամակում վերջին շրջանում առաջացած թուրք-գերմանական լարվածության վերաբերյալ իր մտահոգությունն է հայտնել։

Թուրքական «Դողան» գործակալության տեղեկացմամբ՝ գերմանացի նախարարը նամակում նշել է, որ հիասթափված է, որ թուրք նախարարը չեղյալ է հայտարարել նախատեսված երկկողմ հանդիպումը։

Մաասը նաև քննադատել է Թուրքիայում գերմանական պարբերականի թղթակցի ձերբակալությունը։ Գերմանացի նախարարը շեշտել է, որ Թուրքիան պետք է վերանայի մարդու իրավունքի և ազատությունների
հարցում իր դիրքորոշումը։

Նշենք, որ Թուրքիայի արդարադատության նախարար Բեքիր Բոզդաղը մարտի 2ին սահմանադրական հանրաքվեի քարոզարշավի առնչությամբ պետք է ելույթ ունենար Գերմանիայի Գագգենաու քաղաքում, սակայն վերջին պահին քաղաքապետարանն արգելել է դրա անցկացումը: Քաղաքապետը հայտնել է, որ որոշումը քաղաքական բնույթ չունի: Որոշումը խստորեն դատապարտել է Բոզդաղը` ասելով, որ կատարվածն անընդունելի է: Նա չեղյալ է համարել Գերմանիայի արդարադատության նախարարի հետ հանդիպումը: Ավելի ուշ Թուրքիայում Գերմանիայի դեսպան Մարտին Էրդմանը կանչվել է Թուրքիայի արտաքին գործերի նախարարություն:

Բացի այդ նախօրեին Գերմանիայի կանցլեր Անգելա Մերկելը պահանջել է ազատ արձակել օրեր առաջ Թուրքիայում ձերբակալված գերմանական «Die Welt» պարբերականի թղթակցին՝ Դենիզ Յուջելին:

Մերկելը, արձանագրելով, որ Թուրքիայում խախտվում են լրագրողների իրավունքները, նշել է, որ Գերմանիայի կառավարարությունը ամեն ջանք կգործադրի, որպեսզի Յուլջելը ազատ արձակվի: Գերմանիայի կանցլերը կոչ է արել Թուրքիային հարգել լրագրողների ազատ արտահայտվելու իրավունքը։

Աղբյուր` Ermenihaber.am