Թուրքիան անընդունելի է համարել Ռուսաստանի համագործակցությունը Սիրիայի քրդերի հետ

Տարածաշրջան12:54, 24 Մարտ 2017

Թուրքիան անընդունելի է համարել Ռուսաստանի համագործակցությունը Սիրիայի քրդերի հետ

Թուրքիայի պաշտպանության նախարար Ֆիքրի Ըշըքն անդրադարձել է համացանցում հայտնված ռուս զինվորականների լուսանկարներին, որոնցում երևում է, որ ռուսների համազգեստներին ամրացված է քրդական «Ժողովրդի պաշտպանության ուժերի» (YPG-ԺՊՈւ) զինանշանը:

Ըստ «CNNTurk» լրատվական ծառայության` նախարարն անընդունելի է համարել սիրիայի քրդերի շրջանում ամենաազդեցիկ «Ժողովրդավարական միություն կուսակցության» (PYD-ԺՄԿ) զինուժւ հանդիսացող ԺՊՈւ-ի հետ ցանկացած համագործակցություն:

«Ցավոք, այդ պատկերները վշտացնում են Թուրքիային: ԺՊՈւ-ն ՔԲԿ-ի (PKK-Քուրդիստանի բանվորական կուսակցություն) սիրիական թևն է: Թուրքիան չի ընդունում ԺՊՈւ-ի հետ ԱՄՆ-ի կամ Ռուսաստանի ցանկացած գործակցություն: Մենք շարունակելու ենք ԱՄՆ-ին և Ռուսաստանին ասել, որ ԺՊՈւ-ն ահաբեկչական կազմակերպություն է: Հույս ունենք, որ ժամ առաջ կհասկանան, որ ԺՊՈւ-ի հետ գործակցելը հավասար է օձի հետ պարկի մեջ մտնելուն: Թուրքիան շարունակելու է պաշտպանել և կյանքի կոչել իր դիրքորոշումն այդ առումով»,-ասել է Ըշըքը:

Հիշեցնենք, որ Անկարան Սիրիայի քրդերի շրջանում ամենաազդեցիկ քաղաքական ուժը հանդիսացող «Ժողովրդավարական միություն կուսակցությանը» (PYD-ԺՄԿ) և դրա զինված ուժերը հանդիսացող ԺՊՈւ-ին համարում է ահաբեկչական կազմակերպություն` դրանց ղեկավարներին մեղադրելով ՔԲԿ-ի հետ կապված լինելու մեջ:

Աղբյուր` Ermenihaber.am